AC Milan tan point khat chauh a ngai
Serie A champion chu Pathianni zanah tih chian a ni dawn. Champion lai Inter Milan kut aṭangin AC Milan chuan nomawi chhuhsak ngei an tum, league champion ni turin Stefano Pioli naute hian point khat chauh an mamawh tawh.
Pathianni zan hian Milan khawpui chuan Serie A nomawi a lawm ngei dawn, hlim taka awm tur zawk erawh a la hriat loh. Zan dar 9:30-ah AC Milan chuan Sassuolo an tlawh dawn a, a hun ngaiah Inter chuan Sampdoria an mikhual thung ang.
An dinhmun
AC Milan hi hmahruaitu an ni a, point hnihin Inter aiin an sang zawk. Champion turin point khat hmuh belh tawk, engkim an kutah a innghat tihna a ni - kum 11 zet an lo nghah tawh chu Pioli hoin an hlawh chhuak teuh tawh hle.
Inter tan erawh Milan chetsual chan a ngai, an mikhual Sampdoria hneh pawh ni se inkhel dangah Milan an chak chuan Inter tan beisei a bo. An tih theih erawh an khingpui hneh a ni dawn, chumi bak chu vanneihna an mamawh tel tawh.
Serie A-ah hian point en hmasak ber a ni, chumi dawtah team pahnih intawn tawhna (head-to-head) an en ṭhin. Hemi tehnaah hian Milan an chungnung zawk, tun season vawi hnih an inkhelhah Milan hi vawi khat chakin, ṭum khat chu an inhnehtawk.
A hnai tawh
AC Milan coach Stefano Pioli chuan, "Kan hnaih tawh takzet, season tluana kan rilru puthmang pangngai ang khan match hnuhnung ber pawh hi kan khel tur a ni ang. Football bak thil dang ngaihtuah phal a ni lo," tiin a sawi.
Serie A team zingah Milan hi chawlrualin squad naupang berte zinga mi a ni. Player naupang rual nei mah se, an senior player Zlatan Ibrahimovic (kum 40) leh Olivier Giroud (35) ten an ho thei, zaninah pawh a tu emaw zawkin bul an ṭanpui leh ang.
Italian manager chuan sawi zawmin, "Thil mak deuh pakhat chu, ka nauten hian khelmualah an puitlin zia an lantir ṭhin. Pressure sang leh hautak kan paltlang hnem tawh, tun ṭumah pawh hian kan buai phah loh ka beisei," tiin a sawi.
Pathianni zana an inkhelhna tur Mapei Stadium-ah hian Milan-in record an nei ṭha, kum 2016 hnu lamah an lenluh apiangin tlawm an la nei lo. Pioli naute hi an chesual viau a nih ngawt loh chuan champion tura rinkai zawk an ni chiang hle.
Inter beiseina
Antonio Conte leh Romelu Lukaku an chhuah khan Inter hi an nghing, champion lai ni mah se manager thar Simone Inzaghi enkawl team hi rinkai ber an ni lo. Mahse, hun rei lote chhungin an insiamrem a, nomawi humhim turin a tawp thlengin beiseina an nei.
Lukaku awm lo mah se Lautaro Martinez an nei a, Argentine striker ho hian Juventus hnehin Coppa Italia nomawi an chawi thei. Tun ṭumah pawh hian dinhmun ṭha lo zawk ni mah se a tawp thlengin an bei dawn tih a sawi ngam.
Tun season-a goal 25 khung tawh Martínez chuan, "Match ṭhenkhat kan chakna tura ngaihah kan chak zo lo ṭhin kha a pawi ta. Mahse, hun kal tawh chu siamṭhat theih a ni tawh lo, tunah chuan Sampdoria hneh tura beih a ni tawh mai," a ti.
Inter defender Alessandro Bastoni pawhin hma lam chauh an en thu a sawi a, an beiseina chu tlem tawh hle mah se minute hnuhnung ber thenga an ṭan tur thu a sawi ve bawk - Inzaghi naute hian chak an duh tluk zetin, an elpui Milan chak lo se tih chu an duhthusam a ni ang.