Chen nawnna tlak lo vanram tla fualah Everton an cheng

Everton chuan Ningani zan khan Crystal Palace 3-2 in an lehthal a, Premier League an khel zel dawn. Thil hlutna hi hlimna aṭanga teh ni se Toffees hun tawn hi Premier League champion tluk zetin a hlu ngei ang.

Goodison Park-ah Palace-in Jean-Philippe Mateta leh Jordan Ayew te hmangin first half-ah goal hnih an khung a, him tura chak mamawh Everton ṭantute an ngui hman hle. Amaherawhchu second half-ah inlehthalna ropui a thleng a, mualneitu tan Michael Keane (54'), Richarlison (75') leh Dominic Calvert-Lewin (85') ten goal khat ṭheuh khungin 3-2 in hnehna an chang.

Vanram tla fual
Football-ah hian nomawi ringawt hi hlimna a ni lo a, chumi nemnghettu chu Championship-a champion aiin playoff hmanga Premier League khel tura tling an lawm zawk ṭhin.

Everton hun tawn hi chutiang deuh chiah chu a ni a, Manchester City hian nomawi chawi ta se, an hun tawn ve veah City ṭantute aiin Toffees ṭantute lawmna tawn hi a sang zawk tih chu a chiang. Liverpool an champion erawh chuan lawm zawk tur teh thiam a har thung ang.

Minute 21-naah Eagles tan Mateta-a'n tauh goal a, minute 36-naah Ayew-a'n a khung belh. Goal hnunung zawkah defender Seamus Coleman leh keeper Jordan Pickford ten an hna an thawk tawk lo a, Frank Lampard leh a hote an beidawng hle.

Second half-ah thilmak a thleng ta. Keane-a'n striker goal khunga mawiin a pet goal a, mipui thawm chu ṭha tak a ni. Minute 75-naah Richarlison-a'n a khung belh a, inkhel entu mipui ban an phar suau. Minute 85-naah Calvert Lewin-a'n a tauh goal leh a, lawmna vawrtawp a thleng a ni ta ber.

Inkhelh banah lawm avangin Everton ṭantute khelmual chhungah an lut a, an lawm dan hi thua sawifiah theih a ni ta lo. Toffees ṭantute hian Premier League khel zel duhin Chelsea an hmachhawn ṭum pawhin Blues player-te thlenna hotel-ah an mut ṭhat theih loh halmawi an hal tawh a, stadium chhungah mipui thawm a ṭha ṭhin bawk.

Engtin zel?
Frank Lampard-a'n Everton a zawm chhan a ti hlawhtling a, Toffees-in Premier League an khel zel dawn. Everton hian season 69 chhung a zawnin English top flight football an khel dawn a, khelh zawn reiah Arsenal chiah an tluk lo.

Everton hian an hun tawn hi nuam ti viau mah se thleng nawn leh atan an duh lo ang. Season tharah chuan Lampard leh a hote hian European football an khel pha lo a nih chuan Toffees ṭantute an lawm pha tawh lo ang.

Lampard chuan, "Ka football career chauh ni loin ka hring nun hrim hrimah hian ka hun tawn ropui ber zinga mi a ni. Ka vannei a, Chelsea-ah player leh coach angin hun duhawm tak ka tawng. Chutihrualin tuna kan hun tawn nena khaikhin theih a ni lo. Nomawi kan chawi miah lo. Mahse, inkhelh zawhah khan ka ṭap emaw lawm avangin ka zuang emaw ka lawm dan kha tumahin an sawi thei lo ang. Kan tan zan duhawm a ni," tiin an hun tawn chungchang a sawi.