Burnley nge tla dawn Leeds United?

Premier League aṭangin Watford leh Norwich City an tla tawh a, Burnley emaw Leeds United emawin hmunruak pakhat an hnawhkhat dawn. Clarets hian Ningani zan khan Aston Villa lakah point khat hlu tak an hlawh chhuak a, Leeds United aiin an dinhmun a ṭha hret.

Burnley hian May 22, Pathianni zan dar 8:30 hian Newcastle United an mikhual ang a, hnehna an chan chuan Premier League an khel zel ang. Leeds United erawhin Brentford an tlawh dawn a, top flight football khel chhunzawm turin Clarets aia point hmuh tam a ṭul dawn a ni.

Clarets an fei
Villa Park-ah Burnley tan Maxwel Cornet a che ṭha leh a, Ivorian forward hian Emiliano Buendia lakah first half tawp hma chiahin penalty a hlawh chhuak. Clarets tan Ashley Barnes rawn pen chhuakin penalty aṭangin goal pawimawh a khung.

Second half ṭan chiahah Argentine midfielder Buendia-a'n a tihsual siam ṭhain goal ropui a khung. Minute 48-naah John McGinn-a cross chu Buendia-a'n chak taka tlan lutin box chhungah a volley lut a, goal class tak a ni.

Clarets-in point khat hlawh chhuak turin theihtawp an chhuah a, substitute Matt Lowton chu hun tawp dawnah hnawhchhuah niin goal erawh an chhuah belh tawh lo a, 1-1 in inkhel a tawp.

Bukin awm dawn
Premier League tawp niah Burnley leh Leeds United te bukin an awm dawn. Clarets hian Newcastle United an hmachhawn dawn a, Magpies hi Champions League beisei Arsenal hnehtute a nih avangin tla tur hriatthiam a la har.

Burnley manager lailawk Mike Jackson chuan, "Kan hna kan la zo lo," tiin a sawi a, a thusawi pawmawm hle. Leeds United khingpui tur Brentford pawh hi dah hniam an thiang lo. Christian Eriksen telna Bees hian tlak hlau Everton tan mangchhia an thlen tawh a, Premier League aṭanga Leeds pet thlak an pawi ti lo ang.