Heat mualah Celtics an chak

Boston Celtics hi dah hniam theih an ni lo, khualmualah pawh an ngampa viau. Nimin zing Eastern Conference finals game 2 inkhelah Celtics hian Miami Heat chu 127-102 in an luhchhuah.

FTX Arena, Florida-a inkhelah Marcus Smart a khel ṭha, hmun tinah a awm emaw ni tih mai tur a ni. Point 24 a neih bakah assist vawi 12 lain, rebounds vawi kua a la bawk - an chak theihna hnar pawimawh a ni.

Best of seven series-ah team pahnih te 1-1 in an inhnehtawk ta chiah. May 22, Pathianniah game 3 an khel dawn, an inkhelhna tur hi Celtics mual TD Garden a ni dawn, series lama hmahruai theihna remchang a ni ang.

Game 2 inkhel pumpuiah Celtics tana Jayson Tatum chu point nei hnem ber a ni a, ani hian point 27 a sual chhuak. Heat tan Jimmy Butler chuan minute 32 a khelh chhungin point 29 a nei ve thung a, a tam chakpui nan erawh a tawk zo lo.

Smart hi game 1-ah khan ke hliam vangin a inlan thei lo, tun ṭumah erawh harsatna nei loin a khel thei. Smart chuan, "Inkhel thei loa awm kha chu a hrehawm, ṭhiante pui thei loa awm chu thil hrehawm a ni tih pawh ka hria.

"Tun ṭumah erawh ka ṭhiante ka pui thei ta, team ṭha Miami Heat lakah ṭha taka kan khel thei kha a lawmawm," a ti. NBA defensive player of the year chawimawina dawng thei kha a ni a, a tel chuan a team an danglam tih a takin kan hmu.

Tukin dar 8:30 hian Western Conference finals game 1 khelh a ni dawn. Chase Center-ah Golden State Warriors chuan Dallas Mavericks an lo mikhual ang, game 1-ah Warriors hian hnehna chang tawhin, series-ah 1-0 in hma an hruai mek.

Eastern Conference Finals
Game 1: Miami Heat 118 - 107 Boston Celtics
Game 2: Miami Heat 102 - 127 Boston Celtics
May 22, Pathianni
Game 3: Boston Celtics 06:00 AM Miami Heat
May 24, Thawhlehni
Game 4: Boston Celtics 06:00 AM Miami Heat
(Series-ah 1-1 in an inhnehtawk mek)

Western Conference Finals
Game 1: Golden State Warriors 112 - 87 Dallas Mavericks
May 21, Inrinni
Game 2: Golden State Warriors 08:30 AM Dallas Mavericks
May 23, Thawhṭan
Game 3: Dallas Mavericks 06:30 AM Golden State Warriors
May 25, Nilaini
Game 4: Dallas Mavericks 06:30 AM Golden State Warriors
(Golden State hian series-ah 1-0 in hma an hruai)

Note: Best of seven series hmanga chak zawk zawn a ni a, chak turin game li lak a ngai. Game hmasa pali fixture tihlan phawt a ni.)