Bale hian zah a phu - Ancelotti

Real Madrid coach Carlo Ancelotti chuan nipui transfer ruala chhuak tur Gareth Bale chuan zah a phu thu a sawi a, a player chu club tana a hnathawh avanga zah turin fan-te a ti.

Madrid khaw club hian nizan khan Real Betis nen tun season-a an league match tawp ber an khel a, Real hi an champion chian tawh avangin inkhel result-in an dinhmunah nghawng a nei lo.

Ancelotti chuan, "Bale-a contract a zo dawn a, a chhuak dawn tih mi zawng zawngin an hria. He club history-ah hian a chuang tlat tawh dawn a, fan-ten an theihnghilh tawh lo ang.

"Real-in Champions League nomawi 10-na kan chawina kawngah te khan a ṭangkai em em a, he club tan hian thawnthu ngaihnawm tam tak a hnutchhiah a, chu chu kan hriatsak a ṭul a ni," a ti.

Kum 32 mi Bale hian kum 2013 khan Real Madrid hi a hunlaia footballer man to ber ni turin a zawm a, Spanish club hian pound maktaduai 85.3-in an lalut.

Bale hian Real tan match 258 khelin goal 106 a khungsak a, assist vawi 67 a nei - Champions League-ah vawi li a champion pui a, La Liga-ah vawi thum nomawi a chawipui bawk.

Wales international hi an ram club Cardiff City leh Tottenham Hotspur nen sawizawm mek a ni a, a zawm tur lam a la chiang lo.

May 20, Zirtawpni Zan (Result kan hre hman lo)
Real Madrid 12:30 AM Real Betis
Rayo Vallecano 12:30 AM Levante

May 19, Inrinni Zan
Valencia 09:00 PM Celta Vigo

May 22, Pathianni Zan
Elche 09:00 PM Getafe
Alaves 11:30 PM Cadiz
Granada 11:30 PM Espanyol
Osasuna 11:30 PM Real Mallorca
Barcelona 01:30 AM Villarreal
Real Sociedad 01:30 AM Atletico Madrid
Sevilla 01:30 AM Athletic Bilbao