Auba-a'n ram tana inkhelh chawlhsan

Gabon captain Pierre-Emerick Aubameyang chuan ram tana inkhelh a chawlhsan. 2023 Africa Cup of Nations qualifying aṭanga chuan Auba tel loin Gabon an inlan a ngai dawn tawh tihna a ni.

Kum 32 mi Auba hian ram tan match 72 a khel a, goal 30 a khung - Gabon tana goal khung hnem ber a ni. King's Cup-ah pathumna a nih pui a, nomawi lian tham chawipui a nei lo thung.

Barcelona striker Aubameyang chuan, "Kum 13 chhung zet ram tan ka inkhel tawh a, tunah chuan ka chawlh a hun ve ta. Ram tana ka inkhelh hun a liam a, tawp chin nei loa min thlawp ṭhintu Gabonese mipuite chungah lawmthu ka sawi tak meuh.

"Ram tana ka match hmasa ber ka la hre reng, mahni ram tana inlan hi chu a boruak a danglam ṭhin avangin thawnthu tam tak ka la hre reng bawk a, ka theihnghilh tawh lo ang," a ti.

Auba hian 2015 khan African Footballer of the Year chawimawina a dang a, he award hi football a khelh chhunga a thil ngaihhlut leh ropui a tih zinga mi a nih thu a sawi bawk.

Aubameyang hi a pianna tak chu France a ni a, a pianna ram tan hian Under 21 team thleng chu a khel. Mahse, a pa hi Gabon mi a ni a, an ram captain armband pawh lo hreng tawh a ni - a pa vangin senior level-ah chuan Gabon tan a khel ta zawk a ni.

Ram tan chawl mah se club lamah erawh a la inlan zel dawn. Arsenal aṭanga Barca a pan hnuah a vul leh mek. Catalan club tan La Liga match 16 aṭangin goal 11 a khung a, season tharah Champions League a khelhpui ang.