Mumbai kutah Bangalore an innghat

Indian Premier League-ah Royal Challengers Bangalore chuan match hnuhnung berah pakhatna dinhmun luahtu Gujarat Titans an hneh a, palinaah awm lailawk mah se playoff khel turin Mumbai Indians puihna an mamawh.

Zanin dar 7:30 hian Mumbai leh Delhi Capitals an inkhel ang a, Mumbai hi an chak a nih chuan Bangalore-in semifinal an khel ang. Mumbai hi an chak lo a nih thung chuan Delhi zawkin playoff an khel dawn.

A hun takah Kohli
Wankhede Stadium-ah Gujarat Titans-in vuak hmasak an thlang. Opener Shubman Gill-a'n run khat chauh a siam. Hardik Pandya-a'n thi loa 62 runs a siam bakah David Miller (34) leh Wriddhiman Saha (32) ten 30 runs chunglam an vaw chhuaka over 20-ah 168/5 runs an siam.

Royal Challengers Bangalore-in semifinal lut turin chak ngei an mamawh tih an hria a, Virat Kohli leh Faf du Plessis ten bul an ṭan. India captain hlui Kohli hian ball 54-ah 73 runs a siam a, Du Plessis-a'n 44 runs a siam ve bawk.

Glenn Maxwell (40) leh Dinesh Karthik (2) ten a tawp an khar a, over 18.4-ah 172/2 runs siamin harsatna nei loin hnehna an chang. Bangalore hi wicket riatin an chak.

A ngaihnawm
Bangalore-in hnehna an chan avangin pangana hnuai lam zawng playoff beiseina a tawp nghal. Kolkata Knight Riders, Punjab Kings, Sunrisers Hyderabad, Chennai Super Kings leh Mumbai Indians tan playoff khelh theih a ni tawh lo.

Gujarat Titans leh Lucknow Super Giants te an tling tawh a, thilmak a thleng a nih ngawt loh chuan Rajasthan Royals pawh playoff khel tura ngaih a ni. Nizan khan Royals hian Chennai Super Kings an hmachhawn a, he thu i chhiar meuh chuan an dinhmun a chiang tawh ang.

Zanina Mumbai Indians leh Delhi Capitals inhmachhawn tur hi a pawimawh ta ber a, cricket ngainatute tan zanin inkhel hi hmiah a thiang lo. Delhi tan David Warner-a'n a che ṭha a, Mumbai lakah pawh enbik a hlawh ang.

May 19, Nilaini Zan
Royal Challengers Bangalore bt Gujarat Titans
Bangalore wicket riatin an chak

Gujarat Titans 168/5 (20)
Hardik Pandya 62*(47)
David Miller 34 (25)
Josh Hazlewood 39/2
Wanindu Hasaranga 25/1

Royal Challengers Bangalore 170/2 (18.4)
Virat Kohli 73 (54)
Faf du Plessis 44 (38)
Rashid Khan 32/2
Ravisrinivasan 20/0