Man United tan Europa League?

Manchester United-in tun season match hnuhnung berah Crystal Palace an hmachhawn dawn a, Pathianni zan dar 8:30 hian Selhurst Park Stadium-ah an inkhel ang. Europa League khelh beisei West Ham-in khualmualah Brighton & Hove Albion an hmachhawn thung dawn.

Ralf Rangnick-a kaihhruai team hian hnehna an chang a nih chuan season tharah Europa League an khel ang. Chutihrualin Man United hian Palace laka point an hloh a, David Moyes-a hoten Seagulls an hneh thung chuan Hammers-in Europa League an khel ang.

Man United hian Cristiano Ronaldo lalet mah se season an hmang chhe hle. Premier League history-a point an hmuh tlem ber ṭum a ni a, tunah hian point 58 an hmu mek. Goal an chhuah tam ber ṭum a ni a, goal 56 tehmeuh an chhuah tawh.

Khualmualah match nga chhung an chak lo zawn tawh a, table mawng lama awm Everton leh Burnley ai pawhin goal an chhuah tam zawk. Man United hian season an hman chhiat avangin season tawpa neih ṭhin 'Award Night' pawh an nei dawn lo niin sawi a ni. Tarlan danin United player-te hi an khelh dan avangin an zak a, chawimawina dawn an hreh!

Man United hi season thar aṭangin Erik ten Hag-a'n a enkawl dawn a, Ajax champion puitu manager hian squad chei ṭhat hna a thawk ṭan. United hian an match hnuhnung berah Brighton & Hove Albion chu 4-0 in an hneh lo a, Palace lakah an mualpho nawn a nih chuan nipui bazar laiin player an chhuah tam sawt a rinawm.