Champion rim nam world champion Liverpool

Ningani zan Premier League inkhelah Liverpool chuan 2-0 in Sheffield United an hneh a, Premier League-a kum khat chhunga tlawm miah lo record nei zingah an tel ve ta. Liverpool hian January 3, 2019 khan Manchester City chu 2-1 in an ngam lo a, hemi hnuah hian tlawm an nei leh ta lo a ni - Arsenal (2003-04) leh Chelsea (October 2004 - November 2005)  te chu kum khat chhung tlawm loin an lo kaltluang tawh. 

Club World Cup champion Liverpool tan Mohamed Salah leh Sadio Mane te chuan goal khat ve ve an khung a, Sheffield tan a chhanglettu tur an awm lo. 

Premier League table chung berah Reds an awm chhunzawm zel a, anmahni hnaih bertu Leicester City aia point 13-a sangin match khatin an khel tlem - champion lo tur chuan chetsual fe a ngai tawh ang. 

Liverpool-in Sheffield laka goal khung turin hun an mamawh tam lo. George Baldock chetsual zara ball changtu Andy Robertson chuan Mohamed Salah tan a siamsak a, Egyptian forward tan goal-a chantir turin harsatna a awm lo. 

Salah hian goal dang khung tur pawhin chance a nei nual a, mahse goalkeeper Dean Henderson chet ṭhat zan a nang fuh a, goal post a tih per bawk avangin Salah vanneih zan a ni lo tih theih a ni. 

Mahse, Liverpool an thiam miau a, vanneihna hmanga chelh din chi an ni lo. Season duhawm tak hmangtu Sadio Mane chuan minute 64-naah a khung a, tun season-ah ringawt goal 15 a khung tling der ta. 

Mane hian Reds tan match 151-a khelhah goal 74 khungin assist vawi 26 a nei thei a, Liverpool tan goal 100 a thawk chhuak tawh tihna a ni - a record hi chhuan tham a tling. 

Jurgen Klopp-a'n inkhelh ṭan hma aṭangin Anfield-ah buaina a nei nghal a, starting XI-a tel tura tih Naby Keita chu warm-up na lamah a inhliam a, a aiah James Milner luhtir a ngai. Mahse, hei tak hi Liverpool ṭhatzia pholangtu a ni - Milner a khel ṭha takzet a, Jordan Henderson leh Georginio Wijnaldum nen midfield-a an inkawp chu Reds fans tan chuan thlir ninawm loh a tling. 

Captain Hendo chu fak phu bera chhal ngam a ni a, Anfield-a a hun hmasa lama sawisel tawk nasa midfielder hian Klopp-a'n a rin ngam chhan a pholang leh a, a ball sem, tackle leh a tharum hman thiamna te chu player class sang zia a ni. Anfield-ah Liverpool hi match 51 chhung zet chu tlawm loin an kaltluang tawh a, league-a point 60 hlawhchhuah theih aṭangin point 58 ngawt an nei 

ta bawk.