A hun a thleng ta Aizawl FC Vs East Bengal

Kolkata club lian East Bengal-in I League hmahruaitu ni chungin Mizoram an rawn tlawh a, vawiin tlai dar 2:05 hian Mizo club Aizawl FC nen RG Stadium, Mualpuiah an inhmachhawn dawn.

Red and Gold-ah hian Mizo tlangval Lalrindika Ralte chu player pawimawh a ni a, Khawzawl tlangval Robert Lal­thla­muana a awm bawk.

Vawiin hi state day a nih avangin chawlh a ni a, tualchhung football ngainatute tan RG Stadium pan hun a ni a, mipui an tam dawn avangin kal hma a fin thlak ang.

Bagan Pressure
Kolkata Derby zawhah East Bengal-in result an nei ṭha ngai lo a, Trevor Morgan-a hote hi Mohun Bagan nen goal awm loa an in draw zawhah Shillong Lajong nen 1-1 an inhnehtawk.

Red and Gold elpui ber Mari­ners hian Inrinni zan khan DSK Shivajians an hneh a, Kolkata club lian pahnih hi khelh zat inangah an point a inang chiah a, goal difference hmang chauhin East Bengal an chungnung.

English coach Trevor Mor­gan chuan, "Kolkata Derby zawhah East Bengal hi an vanduai ṭhin a nih chuan kan vanduai tawh a, Shillong Lajong nen kan inhnehtawk tawh - Aizawl FC nen hi chuan derby zawh a ni tawh lo. Mohun Bagan hian an khingpui an hneh a ni mai a, pressure kan neih phah lo," tiin buaina a neih loh thu a sawi a, khelmualah a thusawi finfiahin a awm ang.

Foreigner pali leh Robin
East Bengal-in an mualah hun tawpa Ugandan defender Ivan Bukenya goal hmangin Aizawl FC lakah point khat an hlawh chhuak hram.

Hemi ṭum hian foreigner zingah Haitian midfielder Wedson Anselme chiah chu training pangngai ṭha taka zawm awm­chhun a ni a, second half-ah mangan vangin Bukenya leh Trinidadian forward Willis Plaza te an lut leh bawk.

Foreigner pathum Plaza (6 Goals), Anselme (5) leh Bukenya (3) ten hmun pawi­mawh an chang tawh a, Aizawl FC lakah pawh hian bul an ṭan vek ang.

Trinidadian forward Plaza chuan, "Ka inhliam loh phawt chuan top scorer ka nih theih lohna chhan tur ka hre lo," tiin Vanglaini palai a hrilh a, East Bengal forward hian goal khat chauhin Aser Pierrick Dipanda Dicka chiah a tluk lo.

East Bengal hi an player neih ṭhat vangin an buai thei bawk! Foreigner palina Christopher Payne an lalut thar a, AFC an hmachhawn hmasaka awm lo Indian striker ṭha Robin Singh an neih belh bawk avangin coach Trevor Morgan tan buai­na tham a tling ang.

Shillong Lajong an draw ṭumin Australian forward Payne-a'n bul a ṭan a, Robin Singh bench-ah a awm phah a, an pahnih hian an khel ṭha lo ve ve.

RG Stadium-ah Didika
East Bengal coach chuan, "Dika khelh dan­ah hian ka lungawi a ni," tiin Mizo tlangval fak a, Red and Gold captain hi en bik tham a ni.

Season liam ta khan inhliam vangin Didika hi Aizawlah a rawn zin thei lo a, tun season-ah erawh a dam ṭha a, yellow card vawi thum a hmuh tawh vangin pressure erawh a nei ang.

Mizo tlangval chuan, "Lajong kan hmachhawn ṭum khan Aizawl-a rawn zin ka duh avangin ka duhthusamin ka khel thei lo. Tunah pawh hian yellow card ka hmuh leh chuan Bengaluru ka hmachhawn thei lo ang," tiin a sawi.

Mizo player zinga talent nei ṭha ber zinga mi en hi tualchhung football ngainatu chin chuan an châk vek.

AFC an zam lo
Aizawl FC coach Khalid Jamil chuan, "East Bengal an nih avangin defensive game kan khelh phah dawn lo a, kan khelh dan pangngai thoin kan khel dawn. Inkhela thil thlen dan azir erawh chuan kan tidang­lam ang," tiin an zam phah loh thu a sawi.

Mizo club hian MPL5 best midfielder Lalruatfela Zote an ziak lut a, document ṭul ang tih fel hman a nih chuan East Bengal hmachhawn tur hian a inlan ngei beisei a ni.

AFC coach Khalid chuan, "Fela hi player ṭha tak a ni a, do­cument chungchangah ngaihchan tur kan la nei thung," tiin a sawi. Mizo club hian RG Stadium-ah match nga an khel tawh a, vawi khat chiah inhneh­tawkin a bak zawng an la chak vek.

East Bengal coach Trevor Morgan chuan, "Premier Lea­gue-ah Leicester an champion thei a, Aizawl FC pawh an champion theih lohna tur a awm lo. Team ṭha tak an ni a, fimkhur takin kan khel ang," tiin a sawi.

Mizo club hian Kolkata club hi an hneh chuan table-ah pathumnaah an la ni zel ang a, amah­erawh­chu hmahruaitu nena an inkarah point khat chiah a awm thung ang.