Chelsea-in fiahna paltlang
FA Cup quarterfinal thleng turin Chelsea-in Molineux Stadium-ah Wolverhampton Wanderers 2-0 in an hneh a, Premier League hmahruaitu Blues-in Championship club lakah squad an nei ṭha tawk tih an lantir.]
Riverside Stadium-ah Middlesbrough-in League One club Oxford United lakah harsatna tawk mah se hun tawpah 3-2 in an chak. Inrinni zan FA Cup inkhel panga aṭangin Blues leh Boro te chiah Premier League club zinga quarterfinal thleng thei an awm.
Conte hote
Chelsea-in Turf Moor-ah Burnley an draw a, chutichung chuan league-ah point riat zetin hma an hruai a, champion tura rinkai an ni. Tun season-ah Blues hi European competition-ah an inlan lo a, FA Cup leh league chiah beisei tur an nei tawh. Antonio Conte-a'n FA Cup-ah Championship relegation zone aṭanga point nga chiaha him Wolves an hmachhawn tih a hria a, Clarets an hmachhawn ṭum aṭangin player pasarih zet a thlak.
Wolves-in bul an ṭan ṭha a, Chelsea youth system chhuak George Saville-a'n amah duh lotu Blues goal ban chu minute ngana lekah a pet per nghal. Wolves-in Blues tlarhnung an fiah fo a, an chance neih an hmang ṭangkai thei lo. Chelsea danglamna minute 65-naah a lang a, Eden Hazard leh Willian te thawhrah sengin Pedro-a'n a tauh goal. Spanish forward Pedro hian tun season FA Cup match thum a khelhah goal a khung vek.
Wolverhampton-in last 16 lut turin Stoke City leh Liverpool an hneh tawh a, Chelsea lakah pawh hnehna chan beiseiin goal an chhuah hnuah pawh an nawr let. Amaherawhchu Chelsea-in Reds leh Stoke te neih ve loh Diego Costa an nei a, Spanish international striker hian tun season-a a goal 16-na minute 89-naah a khung.
Chelsea boss Antonio Conte chuan, "Kan rin lawk ang ngeiin inkhel harsa tak a ni a, first half-ah khel ṭha tawk lo mah ila second half-ah goal hnih kan khung avangin chak phu zawk kan ni," tiin a sawi. Blues hi Premier League champion tura rinkai an ni a, FA Cup nomawi chawi tur pawhin an ni aia rinawm an awm chuang lo.
Wolves manager Paul Lambert chuan, "Eng dang nge ka beisei leh tawh chuang ang. Kan game plan angin team ṭha tak lakah kan khel thei a, kan khingpui hi team ṭha naran an ni lo - khawvel huap pawhin an ṭha a ni. Champions League bakah nomawi tam tak an chawi tawh a, zahna tur a awm lo," tiin chak loh a tuar thiam hle.
A tawpah Boro
Middlesbrough-in Grant Leadbitter penalty leh Rudy Gestede te goal hmangin Oxford United lakah first half-ah hma hruai mah se League One club hian Chris Maguire (64') leh Toni Martinez (65') te goal hmangin second 60 chhung lekin an sut zo. Riverside Stadium-ah Premier League club talbuai mah se minute 86-naah substitute Cristhian Stuani-a'n chakna goal a khung.
Middlesbrough manager Aitor Karanka chuan, "FA Cup dik tak kan hmu a ni. Engkim kan thu hnuaiah a awm vek tawh emaw kan tih hnuah minute khat chhungin goal hnih kan chhuah a, engkim a danglam vek a ni. Division hniam zawk club lakah hian kan fimkhur a ṭul a, team ṭha tak vek an ni. Kum thum liam ta khan kan team hian tun dinhmunah Premier League leh FA Cup quarterfinal kan thleng ang tih hi an ngaihtuah thlen phak ka ring lo," tiin team chhia an awm loh thu a sawi.