Arsenal tan insiamṭhat hun

Zanin dar 1:25-ah Ar­senal chu FA Cup fifth round khel turin Sutton United khelmualah an lut dawn a, sawiselna kara leng mek Arsene Wenger-a tan National League club Sutton hi insiamṭhat bul­ṭanna a ni thei a, chu­tih­rualin a mualphona belh­chhahtu a ni thei bawk.

Sutton hian FA Cup fifth round an vawi khat khelhna tur a ni a, an khingpuitu Arsenal tan erawh a vawi 54-na tur a ni thung. Gunners hian 2002-03 season khan Highbury-ah Farnborough 5-1 in an lo hneh tawh a, hemi hnuah tun ṭum hi FA Cup-ah non league club an hmachhawn lehna hmasa ber tur a ni ang.

Arsenal hi Bayern Munich khelmual Allianz Arena-a 5-1 a mualpho hlim an ni a, Germany-a an inkhelhna hi mipui 75,000 lenna a ni a, zani­na an inkhelhna tur Gander Green Lane hi mipui 5,013 lenna niin ṭhutna awm zat erawh 765 chauh a ni thung! A boruak a danglam khawp ang le.

Gunners hian tlar­hnungah Bayern laka hliam tuar Laurent Kos­cielny an chhawr thei dawn lo a, Lucas Perez, Aaron Ramsey leh Santi Cazorla te chu hliam vangin an la chawl mek bawk.

Wenger chuan, "Sou­thampton lakah player naupang zawk ka luhtir tawh a, an khel ṭha hle. Player ṭhenkhat chu Sutton laka chhawr zui tlak pawh an ni. Kan result ṭha lo avangin in­khelh hmabakah rilru kan seng nasa a, kan theihtawpin insiamṭhat kan tum ngei ang," tiin a sawi.

Last 16 inkhel tur hriat a nih hma hian Sutton captain Jamie Collins chuan Premier League club lian Manchester United emaw Arsenal emaw hmachhawn an chak thu a lo sawi tawh. Manager Paul Doswell chuan Arsenal an hma­chhawn dawn tih an hriat hnuah an tan chuan World Cup final ang mai a nih thu a lo sawi tawh bawk.

Tun hmain Arsenal leh Sutton te hi competitive match bikah an la inhmachhawn ngai lo. Kum 2013 pre season friendly an lo khel tawh a, player naupang rual hmangin Gunners 4-3 in an chak. Tun ṭumah hian Sutton hian an squad-ah Gunners thisen kai Craig Eastmond, Roarie Deacon leh Jeffrey Monakana te an kawl mek.

Doswell chuan, "AFC Wimbledon kan hneh kha kan tan cup final ang a ni a, Leeds kan hneh kha European Cup final ang mai a ni tawh bawk - tun ṭuma mi erawh kan tan World Cup final a ni dawn," tiin a lo sawi tawh a, an thlenchin apiang hi an tan sulhnu thar a nih zel tawh avangin boruak zangkhai tak hnuaiah Gunners an lo mikhual dawn.

Premier League leh Champions League no­mawi chawi turin Arsenal tan thil mak a thlen a ngai tawh a, season tawp ruala a contact tawp ve tur Wenger tan FA Cup hi a beisei san theih awm­chhun a ni tawh - French manager hian ṭum dang ang lo takin a player ṭha rual a chhawr a nih pawhin a mak lo ang.