FA Cup ngaihnawmna belhchhahtu Lincoln City Premier League club chungnung bik lo

Khawvela knockout inelna upa ber FA Cup fifth round-ah Premier League club pariat an lut a, pakhatmah an inhmachhawn loh avangin quarterfinal-ah team lian leh te a awm lo turah ngaih a ni. Amaherawhchu Pathianni zanah thilmak a thleng - non league club Lincoln City-in khualmualah Burnley 1-0 in an hneh a, Premier League champion Leicester City chu player 10-a khel League One club Millwall-in an hneh bawk.

Sum hmang hnem Manchester City pawhin John Smith's Stadium-ah goal an khung thei lo a, Pep Guardiola hote erawhin beisei tur an la nei - Etihad Stadium-ah Championship-a pathumna ni mek Huddersfield Town nen hian replay an khel leh ang.

Burnley an nep lo

Burnley hi league-ah 12-na an ni a, amaherawhchu an khelmual Turf Moor-ah chuan team ṭha zinga mi an ni. Sean Dyche-a hote hi an muala match hnuhnung parukah vawi nga an chak a, vawi khat an inhnehtawk. Clarets nena inhnehtawk hi league hmahruaitu Chelsea an ni a, league-a point 30 an hlawhchhuah tawh zinga point 29 chu Turf Moor aṭanga an hmuh a ni a, an mualah chuan Burnley hian Manchester United, Manchester City leh Liverpool te aiin record an nei ṭha zawk.

Turf Moor luhchhuahna

FA Cup last 16-ah hian Imps (Lincoln kohna) leh zanina Arsenal hmachhawn tur Sutton te chiah hi non league club an ni a, kum 1888 hnua non league club-in fifth round vawi khat an thlenna a ni.

Lincoln hi National League-ah match hniha khel tlem chungin point thumin hma an hruai thei a, an elpui zingah team ṭha ni mah se Burnley nena an inkarah hian league pathum - League Two, League One leh Championship a awm. Tun dinhmunah club pahnih inkarah hian club 81 an awm mek tihna a ni!

Turf Moor-ah mikhual Lincoln an bet zawk a, replay pawi an tih loh ang thoin chak châkna an nei a, minute 90 tlinnana minute khat chiah a awm tawh tihin Sean Raggett-a'n corner aṭanga ball kal chu a tauh goal. Lincoln boss Danny Cowley-a'n set piece pawimawhna a hrechiang tih a lang a, English defender feet ruk leh inches ngaa sang Raggett an hmang ṭangkai bawk.

A ropui e

Lincoln hi kum 103 hnua non league club zinga FA Cup quarterfinal lut thei hmasa ber a ni a, football emaw football pawn lam emaw pawh ni se kum 100 chuang daih record thaichhiat hi thil namai a ni lo. Hei chauh hi a ni lo, kum 133-a upa Imps-in an club football history-a FA Cup quarterfinal an thlenna hmasa ber a ni bawk.

Imps boss Danny Cowley chuan, "Kartina football kan khelh ṭhin chu mi zawng zawng ngainat a ni lo a, tun hi khawvel hmuh tura kan khelh theihna remchang a ni. Hnehna kan chan theihna hi 100-ah pakhat vel lek a ni nachunga kan chak hi a lawmawm takzet a ni. Non League team tan chuan quarterfinal luh hi thilmak a ni a, ka naute thawhrim vanga tun dinhmun thleng thei hi kan ni," tiin a lawm hle.

FA Cup semifinal hi Wembley Stadium-ah khelh ṭhin a ni a, Lincoln hian helai hmun thleng tur hian match khat chiah an mamawh tawh a, an thlen chin thlirin theih loh tawp a ni tawh lo.

Leicester an mualpho

Premier League champion lai Leicester City-in an nomawi an humhim tawh dawn lo tih a chiang tawh a, Claudio Ranieri tan Champions League a sang mah mah a, FA Cup-ah an tlak avangin tun season-ah nomawi beisei tur an nei tawh lo.

Foxes-in The Den-ah inkhel an thunun a, League One club Millwall -in goal venhim hna an thawk a, mualneitu tana harsatna belhchhah turin defender Jake Cooper chu minute 52-naah hnawhchhuah a ni.

Leicester-in inkhel an thunun tluan a, Shinji Okazaki goal khung tur vawi hnih chu Millwall goalkeeper Jordan Archer-a'n a dan sak. Foxes tan Demarai Gray leh substitute Jamie Vardy ten goal khungna hun ṭha an hlah bawk. Minute 90-naah Millwall defender Shaun Cummings-a'n chakna goal a khung a, Foxes tan thawhna hun a awm tawh lo.

Millwall manager Neil Harris chuan, "Player 10-in kan khel a, hei vang hian tuna kan chak hi team thawhrah liau liau a ni. Kan khelmualah ṭantu kan nei ṭha a, eng team pawh hmachhawn ila kan tam hneh thei zel a ni. Lincoln result-in phurna min pe a, kan hnawhthawh ai pawhin an hlawhltinna hi a langsar zawk a ni," tiin anmahni ṭantu mipui leh Lincoln a fak.

Leicester manager Claudio Ranieri chuan, "Premier League champion-in League One club an hneh loh chuan zawhna a tam nghal a, kan thawh leh vat a ṭul a ni. Team ṭha zawk kan ni a, Millwall hi chak phu zawk an ni," tiin an khingpuite rilru huaisenna a hmuh hmaih lo.

City an la dam

Manchester City leh Huddersfield te inkhelh ṭumin Pep Guardiola-a'n keeper Claudio Bravo chu match li chhung a awltir hnuah inkhel bul a ṭantir a, first half-ah Barcelona keeper hlui hian Terriers tana (Huddersfield sawina) Rajiv van La Parra leh Jack Payne te goal khung tur ṭha takin a dang a, Philip Billing goal khung erawh offside vangin pawm a ni lo.

Goalkeeper lansarh zanah Huddersfield Joel Coleman-a'n City forward Nolito leh Sergio Aguero te goal khung tur a dan sak bawk. Manchester City manager Pep Guardiola chuan, "Thinrimna tur a awm lo. Championships club ṭha ber zinga mi kan hmachhawn avangin a awlsam lo a ni. Ni hnih liam ta mai khan kan khelhna mualah rugby game khelh a ni a, chuvang chuan kan game a muan phah a ni. Ka player-te khelh danah sawisel tur ka nei lo a, ti tura ka hrilh angin an khel a ni," tiin an chak zawh loh avanga zahna tur a awm loh thu a sawi.

FA Cup quarterfinal draw hi nizan dar 12 khan neih a ni a, kan hre hman lo.

FA Cup Last 16 - Results
Burnley 0 - 1 Lincoln City
LIN : Raggett 89'
Middlesbrough 3 - 2 Oxford United
MID : Leadbitter 26' (P); Gestede 34'; Stuani 86'
OXF : Maguire 64'; Toni Martínez 65'
Huddersfield Town 0 - 0 Manchester City
Millwall 1 - 0 Leicester City
MIL : Cummings 90'
Wolverhampton 0 - 2 Chelsea
CHE : Pedero 65'; Costa 89'