Goal nen Bale a lo kir

Thla thum dawn hliam vanga a chawlh hnuah Gareth Bale-a'n Real Madrid kawr ha chungin a hmel a lan leh ta a, Welsh forward hian a thiam a la theihnghilh hman lo tih pholangin goal a khung nghal.

Inrinni zan La Liga inkhelah Real hian an hmahruaina sawhnghet turin Espanyol chu 2-0 in an hneh a, goal hmahruai khungtu hi Alvaro Morata a ni. Santiago Bernabeu-a hlim lo anga an sawi striker hian Isco hnen aṭanga a ball hmuh chu minute 33-naah a khung.

Minute 12 a tawk
November 22-a Sporting Lisbon an hneh ṭuma a inhliam hnua la inlan leh lo Bale-a'n minute 71-naah goal khungtu Morata a thlak a, Welsh forward hian goal khung turin minute 12 bak a mamawh lo. Kum 27-a upa forward hian Isco hnen aṭanga a ball hmuh chu Diego Lopez tana dan rual lohin a khung.

Real-in Gareth Bale awm loh chhungin Club World Cup nomawi an chawi a, Champions League leh La Liga-ah an che ṭha viau bawk. Mahse, khawvel player manto pahnihna telin Real hi team ṭha zawk an ni tih hmuh turin a awm a, La Liga lama an elpui Barcelona tan kalkawng a hautak sawt dawn.

Bale chuan, "Fan-ten min lawm dan kha a ropui a, ka hlim takzet a ni. Khelmuala ka lo kir hnua goal ka khung nghal thei hi ka tan chuan lawmman ropui tak ang mai a ni. Ka ṭhiante zingah ni nga chauh training ka la nei a, in fit tak tak tur chuan hmabak ka la ngah hle a ni," a ti.

Bale faktu Zidane
Real Madrid boss Zinedine Zidane chuan, "Bale-a'n khelmual a luh hmaa ka hrilh awmchhun chu khelmual chhungah hlim takin va inkhel rawh tih zawng hi a ni. Gareth chu amah chauh hi a ni a, player danglam bik, midang chunga leng a ni," tiin a nau chu a fak hle.

French manager chuan sawi chhunzawmin, "Goal nen Bale a lo kir hi ka lawm a, chung zawng zawng aia ka lawmna zawk chu thla thum vel zet khelmualah hun hmang thei loa a awm hnua football player anga a lo kir leh thei ta hi a ni. Bale hi amah pawh a lo kir leh theih avangin a hlim takzet a, hei bak piah lama kir dan duhawm a awm chuang lo," a ti.

Atletico tan Gameiro
Inrinni zan inkhel dangah Atletico Madrid chuan 4-1 in Sporting Gijon an hneh a, Kevin Gameiro chuan minute nga chhung leka hattrick siamin a team hi hnehna a chanpui. Atletico tan Yannick Carrasco chuan second half ṭan aṭang­a second 20-na lekah goal hmahruai khung mah se Gijon tan Sergio Alvarez-a'n a sut ve leh avangin Diego Simeone-a naute an hawihai hman hle.

Mahse, minute 61-naa Argen­tine manager substitution siamin awmzia a nei a, Gameiro channa a ni. Pound maktaduai 28 man striker hian minute 79-naah a goal hmasa ber a khung a, minute 84 a thlen meuh chuan goal thum a khung fel der tawh! Sporting Gijon-in French striker an chelh lo a, Atletico an tawlhthlu nawn tawh lo - Gameiro hattrick hi kum 2006 hnua La Liga a hattrick lut rang ber a ni a, David Villa chuan Valencia tan minute nga aia rei loah Athletic Bilbao lamah a lo siam tawh.

Simeone a hlim
Atletico boss Diego Sime­one chuan, "Second half-a kan substitution siam kha a pawi­mawh takzet a, khelmual laiah khan min chelh tlat a, mah se Gameiro tlanlut khan engkim a thlak danglam ta vek a ni. Game hautak zet kan khel a, he khelmualah hi chuan chu chu kan tawng fo a ni," tiin inkhel chungchang a sawi a, mak tak mai chu Atletico tan Inrinni zana an chakna hi kum 2008 hnua Gijon khelmual El Molinon a an chak leh hmasak ber a ni.

Diego Simeone chuan Ga­meiro fak nghalin, "Gameiro ka lawmpui takzet a, match khata team tana goal thum pawimawh em em khung hi a har takzet a ni. Hun tawp hnaih lamah Celta Vigo laka kan khelh dan ang mai khan kan theihna kan pholang a, goal kan chhuah hnuah ka nauten insiamṭhat dan an thiam kha ka lawm takzet a ni," tiin an result-ah a lawm thu a sawi.