Bayern Munich-in point hmu hram

Hun tawp dawna Robert Lewan­dowski goal khung hmangin Bayern Munich chuan Hertha Berlin 1-1 in an inhnehtawkpui a, Inrinni zan khan Bundesliga hmahruaitu Bayern hian an dinhmun sawhnghet turin point khat an hlawh chhuak hram.

Zirtawpni zan inkhelah Karim Bellarabi chuan Bundesliga chanchina goal 50,000-na khungin Bayer Leverkusen chu FC Augsburg lakah 3-1 in hnehna a chanpui.

Olympiastadion Berlin-a inkhelah Hertha hian forward Vedad Ibisevic hmangin minute 21-naah goal hmahruai an khung a, tun season-a a league goal hmasa ber a ni.

Champions League last 16-a Arsenal sawp hlim Bayern-in an beisei ang goal an nei thei lawk lo. Hun tawp hma minute 30 a la awmah striker Lewandowski chu bench aṭanga tlan luhtir a ni. Poland international hian hun tawp hma chiahin an si phurh sutna goal a khung hram.

Poland international goal khung hun hi minute 95 leh second 57-na a ni a, kum 1992 aṭanga Bundesliga goal khung hun record mumal tak a awm hnua goal lut tlai ber a ni.

Tun season league match 21 khelh tawh aṭanga vawi khat chiah chak loh la nei Bayern hian point 50 hmuin hmahruaitu an nih chhunzawm zel a, pahnihna RB Leipzig nen an inkarah point riat a awm - kaithar Leipzig hian match khatin an khel tlem thung.

Bayern manager Carlo Ancelotti chuan, "Inkhel hautak kan hmachhawn dawn tih kha chu hriat lawk a ni. Hertha kha an inrem ṭhain an tlarhnung a phui a, a bik takin first half-ah an khel ṭha hle. Second half-ah erawh an insiamṭha a, goal khat aia tam khung thei kan ni - chutihrual erawh chuan point khat ve ve kan hmu kha result awm tak a ni," tiin a sawi.

Goal 50,000

Leverkusen tan Germany internatio­nal Bellarabi chuan Augsburg lakah minute 23-naah goal khungin Bundes­liga mellung pawimawh a phum thar a, Javier Hernandez chuan goal hnih khung belhin 3-1 in hnehna an chang.

Inrinni zan inkhel dangah Borussia Dortmund chuan Wolfsburg 3-0 in an hneh. Dortmund tan hian Lukasz Piszczek chuan goal khat a khung bakah Jeffrey Bruma leh Ousmane Dembele te goal khung tur siamsak bawkin hnehna an chan theih nana player thawhhlawk ber a ni.

Rhein-Neckar Arena-a inkhelah Hoffenheim tan substitute Andrej Kra­maric chuan goal hnih khungin Darmstadt lakah 2-0 in a club hnehna a chanpui. Hoffenheim hian point 37 hmuin league table-ah palina an ni.

Bundesliga table mawngphaha awm mek Darmstadt hian tun season-ah khualmualah bik point an la hmu miah lo.

Hoffenheim manager Julian Nagels­man chu Darmstadt a hmachhawn ni hian kum 29 leh ni 210 a upa a ni a, a khingpui player-te kum chawhrual aiin a naupang zawk - Bundesliga chanchinah hetiang thil a thlen vawi khatna a ni.

Inkhel Results
Dortmund 3 - 0 Wolfsburg
Mainz 05 0 - 2 Werder Bremen
Hertha BSC 1 - 1 Bayern Munich
Hoffenheim 2- 0 Darmstadt 98
Eintracht Frankfurt 0 - 2 Ingolstadt
Hamburger SV 2 - 2 Freiburg