Nice chak niah Balotelli hnawtchhuak

Inrinni zan French Ligue 1 inkhelah Ma­rio Balotelli chu tun sea­son-a a vawi thum nan hnawhchhuah a ni a, an striker-in red card hmu mah se Nice hian Wylan Cyprien goal hmangin khualmualah Lorient 1-0 in an hneh.

League hmahruaitu AS Monaco chu Zir­tawp­ni zan khan Bastia nen 1-1 in an inhnehtawk a, Monaco hian goal an phurh hmasak zet hnuah Portugal midfielder Bernardo Silva hmangin an sut hram.

Monaco hian match 26 khelh aṭanga point 59 hmuin league table-ah hmahruaitu ni mah se Nice nen an inkarah point thum chiah a awm tawh a, champion lai Paris St-Germain-in an inkhelh hmabaka hnehna an chang a nih chuan an nih rual thei tawh dawn.