Leeds United an him, Burnley an tla

Leeds United-in Premier League-a inham tang turin nizan khan Brentford 2-1 in an hneh a, Burnley erawh Newcastle United hneh loin English football inelna sang ber aṭangin an tla.

Premeir League tawp niah Leeds leh Burnley te dinhmun a la chiang lo a, Everton an him tawh laiin Watford leh Norwich City te an tla tawh. Turf Moorah Clarets-in bul an ṭan ṭha lo a, ball-in Nathan Collins kut a per avangin penalty an chawi a, Newcastle-in Callum Wilson hmangin minute 20-naah an khung.

Burnley hian hnehna an chang a nih chuan Premier League-ah an inham tang thei a, na takin goal nawr mah se goal hmaah an hriam tawk lo. Harsatna belhchhah turin Allan Saint-Maximin cross chu Wilson-a'n minute 60-naah a khung a, Magpies-in 2-0 in hma an hruai.

Clarets ṭantuten beiseina an neih theih nan Maxwel Cornet-a'n minute 69-naah siphurh a sut ṭhen a, mah se goal dang hmuh tur a awm tawh lo. Inkhel dangah Leedsin 2-1 in Bees an hneh thung avangin Clarets an tla. Premier League-a kum ruk chhung an awm hnuah Burnley an tla a, fan-ten hriatthiam harsa an ti.

Fan-ten Turf Moor chhuahsan harsa an ti a, chhuak tura hrilh an ngai hial. Leeds erawh Burnley an chak loh avangin draw a tawk a, mah se point khata lungawi loin injury time-a Jack Harrison goal hmangin Bees an hneh. Jesse Marsch leh a hote lawmzia hi thua sawifi ah theih a ni lo.