Real hnawlin PSG-ah Mbappe a cham

Kylian Mbappe chuan Real Madrid pan tura thutlukna a siam hnuah a rilru a thlak a, Paris St-Germain a cham a thlang. France forward cham chhan hi sum vanga ngaih a ni a, La Liga thinrimin UEFA bakah French leh EU thuneitute bulah hek an tum.

Kum 23 mi Mbappe hian kum thum contract a ziak a, PSG-in Inrinni zana Metz an hmachhawn ṭumin puanzar a ni. Contract thar lawm nan Mbappe hian hattrick a siam a, Neymar leh Angel di Maria ten khung belhin Metz 5-0 in an sawp.

Mbappe chuan, " Club- in hmasawnna a neih ang zelin hma ka sawn theih ka inring a, ka theihna ang ka phochhuah theih ngei ka beisei. Ka pian leh seilenna France-ah ngei ka khel chhunzawm thei hi ka lawm," tiin a sawi a, Real Madrid tan an player duh tak lalut turin kum thum chhung chu an nghah leh rih a ngai dawn.

Boruak inlumlet chu
Tun season tawp rualin Mbappe contract a zo dawn a, Real Madrid pan tura sawi a ni. Kumin January thla khan a thu phungin Mbappe leh Los Blancos te hian inremna an nei tawh. Amaherawhchu kar liam ta khan thil thlen dan a danglam ta vek. Mbappe nu Fayza Lamari chuan Mbappe hian Real leh PSG te inremna a neihpui tawh thu a sawi a, ziaka dah a la awm lo thung. 

Club pahnih hian contract ziah man ringawtah euro maktaduai 150 (£127m) pek an inhuam ve ve a, hlawh atan euro maktaduai 40 (£34m) pek an inhuam bakah amah aṭanga sum hmuh (image right) tam zawk chantir an remti bawk. Real beisei angin thil a thleng lo. Zirtawpni zana Real Betis an hmachhawn ṭumin Florentino Pereza'n player-te bulah Mbappe an lak theih loh tur thu a hrilh. PSG erawhin Inrinni zan inkhelh hmain Mbappe hi jersey no. 2025 chuanna nen mipui hmaah an pho chhuak thung.

Eng nge a chhan?
Mbappe hian Monaco aṭangin hming a chher ṭan a, kum 2017 khan Champions League semifinal hial a thleng. Hetih hunlai aṭang daih tawh
hian Real hian lak an tum tawh.

French forward ngei pawhin Real tana a la khelh tur thu a sawi a, a naupan lai pawhin Real Madrid kawr nena Cristiano Ronaldo thlalak chu a
room bangah a tar. Los Blancos pawhin Mbappe ṭawngka ngei an hriat vangin an inringtawk hle.

Thla khat vel liam ta khan PSG chuan kum hnih emaw a aia tam contract ziahpui an tum a, an sum tawktarh pawh a ṭhahnem viau tura ngaih a ni. Mbappe chhungten Real hnenah an thlen a, PSG pek ang zat pek ve an inhuam em, tih an zawt. 

Spanish champion hian PSG pek zat an pek tur thu an hrilh a, image rightah pawh Real hian 50% duh mah se Mbappe lak theih nan hemi aia hniam hi pawi an ti lo. Mahse, PSG neitu hi Qatari an ni a, World Cup thlengtu an ni bawk. Qatar lamin France thuneitute an ngen a, French president Emmanuel Macron pawhin Mbappe hi cham turin a nawr niin sawi a ni.

Mbappe cham chhanah hian sum a pawimawh tih a chiang a, chutihrualin sum ringawt erawh a ni bik lo. French forward hian team enkawltu coachah pawh a duh a thlang thei dawn a, sporting director-ah pawh ngaihdan a thawh theih bakah player lut leh chhuak a pawmpui dawn niin sawi a ni.

PSG hian sporting director Leonardo nena an inṭhen thu an tichiang tawh a, manager Mauricio Pochettino pawh a chhuak hnai. Hemi a nih avang hian Mbappe cham chhan hi 'thuneihna' a tel ngei niin a lang. Khawthlang media ṭhenkhatte tarlan dan phei chuan signing bonus leh
hlawh hi Real ngam zat aia tam niin an sawi a, euro maktaduai 150 ni loin euro maktaduai 300 niin an sawi a, a hlawh pawh chhiah pek hnuah, kum khatah euro maktaduai 100 niin an sawi hial.

Engtin zel?
Khawvel club ropui ber Real Madrid tan erawh mualphona a ni a, tun hmaa mahni it zawng hlah ngai lo khan PSG an ngam lo. La Liga pawhin Cristiano Ronaldo leh Lionel Messi chhuah hnuah 'star' an nei lo a, Mbappe an chang lo hi chânna lian tak ni. La Liga chuan, "Hetiang inremna
hian European football sum dinhmun a tider thaw ng a ni. Infiamnaa inpumkhatna bakah mi sang chuang eizawnna a tiderthawng a, Europe
inelna chauh ni loin tualchhung inelna thlengin a nghawng ang," tiin thuchhuah an siam.

La Liga president Javier Tebas chuan, "PSG hian euro maktaduai 700 an hloh a, player hlawhah euro maktaduai 600 aia tam an seng. Hetichunga sum ṭhahnem tak senga Mbappe contract an pawtsei thei hi football zah lohna a ni," tiin a sawi a, PSG president Al-Khelaifi chu Super League ang thoa football tana hlauhawm a nih thu a sawi bawk.