Champions League khel tur Spurs

Tottenham Hotspur chuan season tharah Champions League an khel dawn, an elpui leh hmelma ni bawk Arsenal chunga awmin Premier League season an khar - Gunners erawh Europa League lamah an inlan thung ang.

Mikel Arteta naute hian beiseina tlemtê chauh nei chungin match hnuhnung ber an khel. Emirates Stadium-ah an mikhual Everton chu Gabriel Martinelli, Eddie Nketiah, Cedric Soares, Gabriel Magalhaes leh Martin Odegarrd te goal hmangin 5-1 in an sawp.

Mahse, inkhel dangah Spurs-in Norwich City 5-0 teh meuhin in an lo hneh ve tho a, an dinhmun a inthlak thei ta lo a ni. Spurs tan hian Dejan Kulusevski leh Son Huengmin ten goal hnih ve ve an khung a, striker Harry Kane chuan goal khat a khung bawk.

Season ruk chhung zet chu a zawnin Arsenal hian Tottenham phak loin season an hmang. North London club pahnih zingah Gunners hi hlawhtling zawk ni mah se, tun hnaiah Spurs an lian zawk tih chu pawm mai a ngai.

Italian manager Antonio Conte-a enkawl Tottenham hi tluk leh din fawma kal an ni ve tho. A changin an phur hluai a, kumin tir lamah khan Conte hian an tan UCL beisei ngam a nih tawh loh thu a sawi hial bawk, an dinhmun a inthlak ngun hle.

Mahse, an elpui Arsenal leh Manchester United ten hun ṭha an bawhpelh zel a, manager tawnhriat nei ṭha ber a nihna chu a tawpah a lang. UCL an khelh dawn avangin Harry Kane chelh chhunzawm an beisei ang, player dang la turin an buk a rit hret bawk ang.

Arsene Wenger thlaktu Unai Emery khan a season hmasa berah point 70 a hmu tling thei. Emery hi duh loin hun an pe rei lo - Arteta hun a inṭan a, zawimuanga hmasawn an tum, an tum ram erawh an la thleng thei mai lo.

Spanish manager Arteta hian a season hmasa berah point 56 a hmu, 2020-21 season khan point 61 hmuin hma a sawn hret. Tun season hman zawh takah point 69 an hmu, hma chu an sawn zel - mahse nipui bazara sum hmang hnem ber chungin Emery hunlai kha an la phak lo a ni.

Season tawp boruak sangah player naupang ho ruh a no, defender pawimawh Ben White, Takehiro Tomiyasu leh Kieran Tierney ten hliam an tawrh avangin tlarhnung a phui lo, match hnuhnung 10-ah goal an chhuah vek a, team an la nghet tawk lo hle.