Europa League-ah Man United

Manchester United chuan season tharah Europa League an khel dawn a, an thiam vang a ni lo. Ralf Rangnick-a naute hi season thara manager tur Erik Ten Hag-a hmaah Crystal Palace lakah 1-0 in chak lo mah se, an elpui West Ham chu Brighton & Hove Albion lakah 3-1 in an tlawm.

Man United hian point 58 hmuin season an khar a, table-ah parukna an ni. Hammers erawh pasarihnaah an awm, manager David Moyes-a naute hian season tharah Europa Conference League an khel thung ang. Palace tan Wilfried Zahaa'n goal awmchhun a khung.

Cristiano Ronaldo tel loa khel United lamin a chhanletna an nei lo. Amaherawhchu inkhel danga Hammers chak loh an chhawr a, an dinhmun pangngaiah an din tlang theih phah.

Season tharah chuan Erik ten Hag hoin Man United hi an inlan tawh dawn. Dutch manager tan hian season ṭan hma aṭangin hnathawh tur a tam dawn, indinthar leh tur chuan nipui bazarah pawh chet ṭhat a pawimawh bawk ang.