A tawp khar nan Real chak zo lo

La Liga champion Real Madrid chuan Inrinni zan khan tun season an league match hnuhnung ber an khel a, an mikhual Real Betis nen goal awm loin an inhnehtawk - champion an nihna erawh a danglam phah lo thung.

Santiago Bernabeu Stadium-a inkhelah, league champion Real hi Betis lamin zahna chibai (guard of honour) an buk. Carlo Ancelotti naute pawhin Copa del Rey champion Betis hi zahna chibai an buk let ve bawk.

Ancelotti-a'n Champions League fi nal an khelh hmaa an match hnuhnung a ni tih a hria, final khel tura inbuatsaihna a nih nghal avangin a player neih ṭhat a chhawr, season tawp ruala chhuak tur Gareth Bale hming erawh a lang lo.

Tun season league goal 27 khungtu Karim Benzema-a'n remchang ṭha zet vawi hnih a nei a, mahse a khung lo. Minute 90 chhungin goal khung tumin vawi 17 zet shot nei mah se an hlawhtling lo a, mikhual tan substitute Joaquin-a'n a khung teuh hle.

Inkhelh hmain Ancelottia'n Real Madrid tana Bale pawimawhna leh zah a phu thu a sawi, a tira squad a puan zingah chuan a tel - mahse inkhel tur tak tak player 23 a thlan chhuah zingah erawh a tel lo.

Kum 32 mi Bale hian 2013 September thla khan Tottenham aṭangin Real Madrid a pan. Spanish club tan hian goal 106 a khung a, Champions League nomawi vawi li lai a chawi pui, season tharah erawh club dang a zawm a ngai dawn.