Rangers an vannei ta

Europa League final-ah Rangers-in penalty shootout hmangin Eintracht Frankfurt an hneh lo a, Scottish Cup final-ah erawh Gers hi a vannei zawkah an ṭang.

Hampden Park-ah Rangers leh Hearts ten Inrinni zan khan final an khel a, hun pangngaiah goal a lut lo. Extra time-ah Gers tan Ryan Jack (94') leh Scott Wright (97') ten an khung a, 2-0 in hnehna an chang.

Dutch manager Giovanni van Bronckhorst chuan Europa League final aṭangin player panga ngawt a thlak a, chutichung chuan chak phu zawk niin Hearts keeper Craig Gordon a che ṭhat vang chauha extra time khel an ni.

Rangers manager Giovanni van Bronckhorst chuan, "Hna kan thawkrim a, Europe-ah pawh thui tak kan thleng a, Scottish Cup-ah pawh kan che ṭha. Kan hnathawh rah seng ngei kan duh a, a rah chu kan hmu ta," tiin a sawi a, chak an phu thu a sawi tel bawk.