East Bengal hnehtu Mizo club Aizawl FC-in chak an phu - Trevor Morgan

Mualpuiah RG Stadium ṭhut­naa leng lo mipui an pung­khawm a, Aizawl FC ṭawiawm tura kalkhawm Mizo mipui hian minute 90 chhung awmze neiin thawm an siam a, Mizo club-in I League hmahruai mektu East Bengal an hneh.

Nimin I League inkhel hmuh­nawm takah R. Laldan­mawia'n goal awmchhun a khung a, Sialhawk tlangval hi hero of the match-ah thlan a ni. Aizawl FC-in 1-0 a Red and Gold an hneh avangin league hmahruaitu an phak lohna hi point khat chiah a ni tawh. East Bengal coach Trevor Morgan chuan, "Chak phu zawk an chak a ni," tiin inkhelh banah Mizo club-in chak an phu tih a sawi.

Aizawl FC hian match 10 khelhah point 20 an hmu a, an chunga awm India rama club langsar pahnih East Bengal leh Mohun Bagan an phak lohna chu point khat chiah a ni. Mizo club hian February 25 khian khualmuala an hneh loh Chennai City an mikhual dawn a, hemi result hian season tawpah nghawng lian tak a nei ang.

Mizo tel lohna
East Bengal captain Lalrin­dika Ralte chu bench-ah dah a ni a, Khawzawl tlangval Robert Lalthlamuana pawh English coach Trevor Morgan-a ruahmanna hmasaah inkhelh bul ṭan tur ni mah se hritlang awm na avangin squad-ah dah a ni lo a, Australian forward Christopher Payne pawh chhawr theih turin a hming ziah luh a ni lo bawk.

Kolkata club tana bul ṭantu zingah Mizo player an awm lo a, English coach chuan, "Didika kha a chauh vangin bench-ah ka dah a, theih chu ni se luhtir loh kha ka duh a ni. Amaherawhchu inkhel thlak danglamtu kan mamawh avangin second half-ah khan loh theih loin ka luhtir," tiin Lunglei tlangval khelh loh chhan inkhelh banah a sawi fiah.

Danmawia In
Aizawl FC player thar Lalruafela Zote chu training vawi khat chiah a la zawm avangin squad-ah telh a ni lo a, Ashutosh Mehta chu damloh vangin a inlan thei lo bawk.

Mumbai FC aṭanga Mizo club zawmtu Ashu aiah hian MPL1 best player Danmawia chu luhtir a ni a, Bengaluru nena inhnehtawk team aṭangin player pakhat chiah hi thlak a ni.

AFC chhantu bar
East Bengal-in bul an ṭan ṭha a, Haitian forward Wedson Anselme-a'n minute thumna lekah crossbar a pet per nghal. Red and Gold hian goal khung nghat se chuan Mizo club tan talchhuah a har tawh ang.

Amaherawhchu Aizawl FC an insiamrem a, Kolkata club hian first half-ah goal zawnah vawi khatmah an pet tawh lo. Mizo club-in vawi tam East Bengal tlarhnung an rum ṭhaih a, Danmawia'n 15 yards vel lek aṭangin a volley goal lo. Hei chauh hi a lo, Brandon VL Remdika cross chuan Rahul Bheke kut a fuh niin lang mah se referee-in penalty a pe lo a, first half-ah goal a lut lo.

Chak tum Kolkata club
Trevor Morgan-a'n chak a duh tih lantirin second half ṭantirhah Didika leh Robin Singh a luhtir nghal a, East Bengal-in chak an duh. Kolkata club-in an game plan an thlak a, palian Robin Singh a hnawksak nghal a, amaherawhchu mipui ṭanpui Aizawl FC an zam phah lo.

Didika'n khelmual chhung­ah a thuneihna lantirin freekick-ah veteran midfielder Mehtab Hossain nam sawnin Mizo tlangval hian a pet. Didika a chesual zui a, AFC captain Alfred titluin yellow card a hmu. East Bengal midfielder hian tun season-a yellow card palina a hmuh avangin Bengaluru FC a hmachhawn thei lo ang.

Sialhawk tlangval
Aizawl FC an bet rei lo a, minute 58-naah dinglam aṭang­a Jayesh Rane vawrhluh chu Danmawia'n a vawi khat khawihnaah East Bengal keeper Rehenesh a pet khum zet a, a tauh luh chhunzawm nghal. RG Stadium-ah Mizo mipui an ṭhahnem bawk a, lawm avanga au thawm pawh a ring tham hle.

East Bengal an chefuh thei lo a, Didika ball sem hmuhnawm mah se tlarhma lamin a hmawr an bawk thei lo. Aizawl FC lamin counter attack hmangin goal dang khung belh theihna tur vawi li vel lai an nei a, vawi khatmah an hmang ṭangkai lo. Ivorian forward Bayi Kamo Stephane chu ṭum dangah sawisel hlawh deuh mah se East Bengal hmaah erawh goal a khung lo chungin mipui lawm a hlawh hle.

Chak phu an chak
East Bengal coach Trevor Morgan chuan, "Player 11 khan kan game plan anga an khelh a ṭul a, 11 zinga panga chauhin an tih chuan awmzia a awm lo. Team angin kan khel lo a, kan khingpuite kha an khel ṭha zawk a ni. Club lian kan nih avangin point thum hmu tur kan ni lo a, kan khelh ṭhat a ṭul. Aizawl FC an khel ṭha zawk a, chak phu zawk an chak a ni," tiin Mizo club a fak.

English coach Morgan chuan sawi chhunzawmin, "Entu an ṭha em em a, Aizawl FC khan ṭawiawmtu ṭha tak an nei a, inkhelh a harsat phah a ni," tiin Mizo mipui a fak.

A tlachawpin
Aizawl FC coach Khalid Jamil chuan, "East Bengal kan hneh avangin champion chungchang sawi thei kan la ni chuang lo a, Chennai City nena kan khelh leh tur atan rilru kan pek phawt a ṭul a ni," tiin a ṭawng fimkhur hle.

Khalid chuan sawi chhun­zawmin, "Aizawl hi ka rawn thlentirh aṭangin nuam ka ti a, tun thlengin ka hmuh dan a la ngai reng. East Bengal nen ṭawiawmtu kan nei ṭha lehzual a, hetiang reng hi ni thei se a duhawm hle. Mipui kha player 12-na an ni a, kan chakna kawngah khan an pawimawh a ni," tiin mipui chungah ngenna a siam.

Mipui chu
RG Stadium-ah mipui pungkhawm tam ber ṭum a ni tih a chiang a, tualchhung football ngainatute tana ropui erawh mipuiin awmze neia Aizawl FC an au phur kha a ni.

Mipui ṭhahnem takin kawr sen an ha a, East Bengal leh Aizawl FC inkhelh ṭum hian Mizoram chhunga 'Mexican Wave' mawi ber siam a ni bawk. Mizo mipui tam zawkin kawr sen an hak theih hunah a ropui lehzual ang a, an hmuhnawm lehzual bawk ang.