Lajong tana malsawmna Vanmalsawma!

Pathianni zan khan Mizo rawlthar Isaac Van­malsawma chuan Shillong Lajong tan goal ropui a khung a, Chennai City khelmualah Meghalaya club hi 4-1 zetin an chak.

Chennai khaw­­puia inkhelah hian Lajong tan Fabio Henrique (38'), Isaac Vanmalsawma (65'), Bipin Singh (77') leh Aser Pierrick Dipanda (77') te chuan goal khat ṭheuh an khung a, Chennai tan minute 89-naa Haroon Fakhruddin goal khung chu an mualpho zualpui tur khuhna chauh a ni.

Isaac a hlim

Shillong Lajong-in Aizawl FC an rawn len­chilh ṭuma captain armband hrengtu Isaac-a'n free kick aṭangin tun season league match-a a goal hmasa ber a khung a, Hnahthial rawlthar hi a hlim hle.

Nikuma India senior team tana a match hmasa ber lo khel tawhtu Isaac chuan, "Free kick aṭanga goal khung hi chu a nuamin a danglam bik a, ka hlim takzet a ni. Theihtawp chhuahin ka beih chhunzawm zel dawn a, coach-in min rin miau avangin nuam ti takin ka khel ṭhin a ni," a ti.

Isaac chuan sawi chhun­zawmin, "Season bul ṭan fuh lo mah ila tun hnaiah harhtharna changin hma kan sawn zel a, kan tum chu sang taka season khar hi a ni tawp mai. Mimal takin tum hranpa ka nei lo a, ka duh ber chu team-in hma kan sawn zel hi a ni. Hmasawnna tur tam tak ka la nei a, rim taka thawh chhunzawm zel ka tum ang," tiin chawlh mai a la tum lo.

Chennai khelmualah hian ṭum dang ang bawkin Samuel Lalmuanpuia chuan inkhel bul a ṭan a, Joseph Lalfakzuala chu hun tawp nan minute hnih chiah a awm tawh tihah tlan luhtir a ni bawk.

Pereira a tlawm

Churchill Brothers-in coach thar Derrick Pereira kaihhruaina hnuaiah beiseina sang tak nen Mi­nerva Punjab mikhual mah se hnehna an chang zo lo a, inkhel hmuhnawm takah 4-5 in an tlawm.

Mikhual team tan David Ngaihte chuan minute linaah goal hmahruai khung mah se, Churchill lamin Ches­terpoul Lyngdoh (7') leh Adil Khan (18') hmangin an chhanglet nghal.

Season hmasaa DSK Shivajians coach Pereira hnuaia Churchill phur vanglai takin Simranjeet Singh (22') leh Souvik Das (31') ten Minerva beiseina an chhi nung ve leh a, Ansumana Kromah (41',76') chuan goal hnih khung ve leh bawk mah se Loveday Enyinnaya (69') leh Kareem Nurain-ten penalty hmanga an chhanlet avangin mikhual team an chak ta zawk a ni.