City mikhual tur Falcao awmna Monaco
Pep Guardiola enkawlna hnuaia Champions League bung thar kai tum Manchester City chuan last 16 first leg khel turin zanin dar 1:15 hian Eihad Stadium-ah AS Monaco an mikhual dawn a, French club hi Radamel Falcao hoin an rawn thawk chhuak dawn.
Manchester City leh Monaco te hi tun hmain an la intawng ngai lo, an vawi khat intawnna tur a nih avangin sulhnu ṭha hnutchhiahtu nih an tum ve ve dawn a, player ṭha rual kawltu City leh tun laia khelṭha tluang Monaco inkhel tur hi a hmuhnawm ang.
Premier League club zingah Man City, Leicester City leh Arsenal ten knock out stage an lut a, Gunners hi Bayern Munich lakah 5-1 a an mualpho tawh avangin English club zingah City leh Foxes te chauh hi round sang zawk lut tura beisei nei an ni tawh.
Guardiola-a'n Barcelona leh Bayern Munich te hlawhtling taka a enkawl hnuah City a zawm a, City neitute duh chu Europe-a hlawhtlin a ni. Pep-a naute hian group stage-ah Barcelona tluk lo mah se last 16 an inhlangkai tho a, Nou Camp-ah 4-0 a an chak loh hnuah Catalan club an mikhual ṭumin 3-1 in hnehna an chang let thei.
Gabriel Jesus chu ke phah ruh hliam vangin a inlan thei dawn lo a, Brazilian rawlthar duhawm hi tun season chhungin a hmel kan hmu tawh lo mai thei. A zawna match li chhung bench-a a ṭhut hnuah Sergio Aguero-a'n FA Cup fifth round-a Huddersfield nen an inhnehtawk ṭumin inkhel bul a ṭan leh a, Argentina international striker hian Championship club lakah goal khung rih lo mah se Monaco a hmachhawn ang.
Huddersfield an hmachhawn ṭuma captain Vincent Kompany inlan loh chhan chu Pep-a'n, "Thil lian tham a ni lo," tiin a sawi a, tun season-a minute 341 chauh la inlan defender hi a hliam dam tawh mah se Monaco lakah a inlan dawn leh dawn loh a chiang lo.
City hian tun hmain French club vawi thum an hmachhawn tawh a, chak loh an nei lo. Paris Saint-Germain nen vawi thum inkhel tawhin vawi khat an chak a, ṭum hnih an inhnehtawk thung.
Manchester City director of football Txiki Begiristain chuan, "Tun dinhmunah chuan Monaco hi French league lama team ṭha ber an ni a, Tottenham leh Bayer Leverkusen te awmna group a hmahruaitu ni thei an ni. Player naupang te te theihna nei sang tak tak awmna an ni," tiin a sawi.
Falcao hoin aw...
Premier League-ah season hnih hun a hmang a, inelna hrang hrangah match 41 khelin goal nga a khung - Manchester United leh Chelsea tana Falcao chetdan hi a ropui lo. Mahse, tunah erawh City tlarhnung tana ven uluk ngai ber tur a ni leh tawh!
Colombia international striker hi nipui lai khan a club pangngai Monaco-ah a kir a, French club tan hian inelna hrang hrangah match 28 aṭangin goal 22 a khung tawh a, league bikah goal 16 lai a khung. Porto leh Atletico Madrid lama goal thunkhawl a nih ṭhin ang kha a ni leh tawh!
Ligue 1 hmahruaitu Monaco hi tun season kal laia European club zinga goal khung thei berte zinga mi an ni mek, league match 25 khelh tawh aṭangin goal 75 zet an khung tawh a, khelh zat inangah City hian goal 51 chiah an la khung.
Monaco hian 2014-15 season khan last 16 aṭangin Arsenal an lo pet chhuak tawh a, kumin group stage-ah Tottenham chu 2-1 in an hneh tawh bawk - English club an hlau lo tawp ang.
Monaco coach Leonardo Jardim chuan, "City hi player ṭharual awmkhawmna a ni a, season hmasa khan semifinal an lut bawk. Khawvela coach ṭha berte zinga miin a enkawl an nih avangin team ṭha an ni a, Real Madrid leh Bayern Munich te ang thoin group hmahruaitu ni lo mah se rinkai an ni. Tlang tura rinkai zawk ni lo mah ila ka naute theihna san zia ka hriat avangin kan zam lo," tiin a sawi.