FA Cup quarterfinal-ah Chelsea Vs Manchester United
Pathianni zan khan FA Cup quarterfinal draw neih nghal a ni a, Premier League hmahruaitu Chelsea leh Blues boss hlui Jose Mourinho enkawl Manchester United chu pawh fuh an ni. Inelna hi March 10-13 inkara khelh tur a ni.
Nizan khan Arsenal leh non league club Sutton te an inkhel a, result kan hre hman lo. Gunners hian National League club Sutton hi an hneh thei a nih chuan quarterfinal-ah Lincoln City an hmachhawn ang. Lincoln hian last 16-ah Burnley an hneh a, kum 103 hnua non league club quarterfinal lut leh thei hmasa ber an ni.
Manchester City-in khualmualah Championship club Huddersfield an draw avangin February 28-ah replay an khelh ang a, Pep Guardiola hoten hnehna an chang a nih chuan Middlesbrough an hmachhawn ang. Tottenham-in Premier League champion Leicester City hnehtu Millwall an hmachhawn thung ang.
Inkhel tur zinga ngaihven hlawh ber erawh Stamford Bridge-a inhmachhawn tur Chelsea leh Manchester United te an ni a, tun hnaiah Mourinho-a'n London club-a amah thlaktu Antonio Conte khelh dan thuthar thehdarhtute hmaa a sawi ṭhin avangin boruak a sang sawt bawk ang. Tun season-ah club pahnih hi vawi khat inhmachhawn tawhin Conte hoten an mualah United hi 4-0 in an sawp.
Quarterfinal - Fixtures
Chelsea Vs Manchester United
Middlesbrough Vs Huddersfield/Manchester City
Tottenham Vs Millwall
Sutton/Arsenal Vs Lincoln