A hunah tak Zlatan

Manchester United-in FA Cup quarterfinal an luh theih nan bench aṭanga Zlatan Ibrahi­movic luh a ngai a, veteran striker hian 'goal special' tak thunin Championship club Blackburn Rovers lakah chakna goal a khung.

Ewood Park-ah Blackburn-in Pathianni khan an mikhual Man United an barakhaih a, Danny Graham hmangin mi­nute 17-naah hma an hruai.

Red Devils-in minute 10 hnuah Marcus Rashford hmangin sut mah se goal dang khung an harsat a, Jose Mourinho-a'n bench aṭangin a striker neih hriam ber Ibrahimovic leh khaw­vel player manto ber Paul Pogba te chu dakar khat pelh hretah a luhtir.

Minute 75-naah Pobga ball vawrh luh chu Zlatan-a'n thiam takin a um lut a, a hun neih ang chhun thiam taka in­siamrem nana a hman hnuin a ke dinglamin chakna goal a khung.

Mind Game

United manager Mourinho chuan Championship aṭanga relegate thei dinhmuna ding Blackburn Rovers an hmachhawn hmain a player hahdamtir dan tur chungchang a sawi.

Portuguese manager chuan, "Kum 2005 khan Barcelona leh Liverpool inkhel tur ka ngaih pawimawh lutukna lamah FA Cup ka ngaihthah a, Newcastle lakah kan chak lo. Champions League-a Barcelona hneh kha a nuam a, League Cup final-ah Liverpool kan hneh bawk. Amaherawhchu FA Cup nomawi kha mahni duhthu ngeia paih boah ka inngai a, ka inthiam thei lo. Tunah chuan ka chak lo a nih chuan ka khingpuite ṭhat vang a ni ang a, kan khelh ṭhat loh vang pawh a ni thei a, mah se ngaihthah vanga chak loh ka duh lo," tiin FA Cup a ngaih pawimawh thu a sawi.

Manager tawnhriat nei ngah Mourinho hian Europa League-a Saint Etienne an hneh ṭum aṭangin player pasarih zet a thlak a, Ashley Young chu right back-ah dah a ni a, tun hnaia khelhna hmun chang tam lo Jesse Lingard khelhna hun pek a ni a, Ibra leh Pogba an lut lo bawk.

The Special One tia inchhal ngam Mourinho-a'n FA Cup pawimawh zia a sawi chhan ber nia lang chu, a khingpui manager Owen Coyle chhaih buai bakah a player-te fuih phur a tum niin a lang. Portuguese manager erawh a fimkhur tel tho, chhawr theih turin a player ṭhate bench-ah a dah tho.

Blackburn dang daih

United khingpui hi Premier League ṭan chhoh laia Sir Alex Ferguson-a hote elpui Blackburn kha la ni reng mah se an ṭha tawh lo.

Blackburn hian 90s chhoah Alan Shearer, Chris Sutton, Graeme Le Saux leh Tim Sherwood te neiin United tan elpui tham an ni a, club sulhnu nei ṭha Liverpool tih theih loh Premier League nomawi hial chawi tawh an ni.

Tunah erawh Rovers hi Championship club-ah pawh team naran pawl niin table-ah 23-naah awmin tla thei dinhmunah an ding mek. Blackburn hian player manto an kawl tawh lo a, an player tam zawk hi a thlawn leh loan hmanga an lak a ni.

Pathianni zanah Swansea City aṭanga loan hmanga an hawh Marvin Emnes chu United tlarhnung tan buaina tham a tling a, Dutch midfielder pass ṭha tak hi English forward Graham-a'n Argetine keeper Sergio Romero tana dan rual lohin a pet goal. Kum 31-a upa Graham hi Sunderland-in an duh loh avangin an chhuah zalen a, Rovers hian lalutin club top scorer a ni mek.

Team ṭha danglamna

Henrikh Mkhitaryan-a'n Borussia Dortmund aṭanga United a zawm hnuah beisei a pha lo a, theihna a nei tih erawh a khat mawi tawkin a lantir thung. Blackburn Rovers nen pawh hian Armenian midfielder hian field lai aṭangin Rovers defender pahnih pelin Marcus Rashford tan ball class lutuk a pe a, English forward Rashford-a'n awlsam takin a khung.

United-in goal hnihna an khung lawk theih loh avangin Pogba leh Ibra te luhtir an ni a, Mourinho substitution awmze nei hi inkhel danglamna ni zui mah se chhandamtu dang an la awm. Spanish keeper David de Gea aia lut Argentine keeper Romero-a'n a zawnin Connor Mahoney, Anthony Stokes leh Marvin Emnes te goal khung tur a dang a, a vawi lina dang thei lo mah se assistant referee-in offside flag a phar a, United squad chhah ṭhat zia a lang.

Eng nge an sawi?

Blackburn boss Owen Coyle chuan, "Kan khelh dan lung­awi thlak viau mah se kan chak zo lo a, tumahin chak lo zawka ṭan an duh lo. Tunah chuan United laka kan khelh ang hian Championship-ah kan khelh chhunzawm theih a ṭul a ni," tiin an khelh dana a lungawi thu a sawi.

Mourinho chuan, "Kan beisei aia nain min nawr ngam a, an huaisen bakah an chak bawk. Kan rilru put hmang chu dik lo se kan buai lehzual khawp ang. Inkhelh ṭantirh lamah kha chuan tu nge theihna ngah zawk tih kha a lang lawk lo a, tuna an theihna hi Championship-ah an chhawm a nih chuan an relegate lohna chance hi a sang a ni," tiin an khingpui a fak.

Portuguese manager chuan sawi chhunzawmin, "Sub­stitu­tion tihfuh loh ṭum a awm a, tun ṭumah erawh Zlatan leh Paul te kha lut turin an inpeih tak­­zet a, danglamna an thlen bawk avangin ka lawm a ni," tiin inkhelh banah a sawi. Kum 35-a upa Zlatan Ibrahimovic hian league nei ṭha ram pali knockout inelna FA Cup, Coppa Italia, Copa del Rey leh Coupe de France-ah goal a khung vek tawh.