Jeje tel loin Bagan zin

Mohun Bagan chuan Maldives-a AFC Cup South Zone Playoff game Club Valencia nena khel turin Pathianni khan Kolkata khawpui an chhuahsan a, zanina an inkhel turah hian Vanglaini palai hnena a kawnga hliam tenau a neih thu sawitu Mizo tlangval Jeje Lalpekhlua chu hruai zingah a tel lo.

Hnahthial tlangval Jeje bakah hian player pawimawh Debjit Ma­jum­der, Pritam Kotal, Pronay Halder, Souvik Chakraborti leh Sony Norde te chu chawlh hah­damtir an ni a, Norde hian DSK Shivajians an hmachhawn ṭumin minute 90 khel mah se zai a ngaih dawn leh dawn lohah thuchiang a la awm thei lo.

Kolkata club lian hian AFC Cup an khelh tur hi players ṭha ṭhenkhat hah­chawlhtir nan an hmang a ni mai lo a, coach Sanjoy Sen pawh zin zingah a tel lo! Assistant coach Shankarlal Chakraborty chuan Bagan enkawl hna hi a thawk rih dawn a ni.

Mariners hian Federa­tion Cup nomawi an chawi avangin AFC Cup pre­li­minary round an khel a, Colombo FC an hneh hnuah playoff khel tur hian an inpetkai. Bagan hian playoff hi an paltlang thei a nih chuan group stage-ah lutin Group E-ah Bengaluru te nen an awmho ang.