Man United an kal fawr

Manchester United an phur satliah lo - an game a nghetin goal khung an uar bakah goal an venghim tel. Ningani zan khan Red Devils hian Villa Park an luhchhuah a, Aston Villa 3-0 in an sawp.

Ole Gunnar Solskjaer-a hote hi Premier League history-a match li chhung a zawna goal thum emaw a aia tam emaw a khingpuite hneh thei hmasa ber an ni. United hi panganaah an awm a, pathumna Chelsea an phak lohna point hnih chauh a nih avangin season thara Champions League khel turin beiseina an nei sang hle.

United tan ṭum dang ang thoin Bruno Fernandes a thawh hlawk a, Portuguese midfielder hian penalty aṭanga goal hmahruai khungin Paul Pogba leh Mason Greenwood ten goal khat ve ve an khung bawk.

Relegate hlau Aston Villa-in bul an ṭan ṭha a, United nena sawi zawm Jack Grealish chu player hmuhnawm zinga mi a ni. Mualneitu tana goal chance nei hmasa ber erawh Trezequet a ni a, Aston Villa forward hian Pogba ball chhuhsakin goal ban a pet per.

United-in insiamrem turin referee puihna an mamawh a, minute 27-naah Bruno Fernandes-a'n a penalty hlawhchhuah chu goal-ah a chantir nghal a, an hawikir tawh lo. Villa Park-ah United-in an thiamzia an pholang a, rawlthar duhawm Greenwood-a'n Villa keeper Pepe Reina tan hna a siamsak a; Luke Shaw leh Anthony Martial te tlarhnung an ṭhiah hnuah Fernandes-a'n hnai tak aṭangin goal zawnah a tauh thei lo.

Half time hma hretin United-in goal an khung ta tho a, Greenwood-a'n a ke dinglamin kawh zetin a pet goal. United rawlthar hian a ke pahnih a hmang thiam ve ve a, freekick leh penalty pawh a pet chhawk mai ṭhin.Second half-ah United-in goal khat chiah an khung belh a, minute 58-naah corner aṭangin Fernandes-a box pawna awm Paul Pogba a pe a, French midfielder hian goal kilah tak a dah. Solskjaer-a hoten goal dang khung theihna hun ṭha an nei a, Aaron Wan-Bissaka-a'n hnai tak aṭangin a tauh lut lo a, Martial-a'n crossbar a pet per bawk.

United harhtharna chan hi Covid-19 hnu ni ringawt loin Bruno Fernandes-a awm hnuah a ngaih theih a, Portuguese midfielder hian English club tana league match 10 a khelhah goal sarih khungin assist vawi ruk a nei bawk.

Fernandes hi Paul Pogba awm hnuah a che ṭha lehzual a, chutiang bawkin Portuguese midfielder hian French midfielder hi a ti ṭha viau bawk. Pogba chuan, "Manchester United hi club lian a ni a, beiseina pawh a sang. Tuna kan khelh dan hi a lungawithlak a, kan chhunzawm zel pawh a ṭul," tiin an khelh danah a lungawi hle.

Football chanchin ziak ṭhinten Mason Greenwood chanchin an tuipui ta hle. United academy chhuak hi kum 18 mi chauh a ni a, khelmuala che vel hmuh chuan hmabak a nei êng hle. Solskjaer chuan, "A hmalam hun chu a kutah a awm," tiin a nun fimkhur phawt chuan thui tak a thlen theih thu a sawi. Greenwood hian Villa lama goal a khung avangin Wayne Rooney record nih rualin United rawlthar (teenager) zinga league match thum a zawna goal khung thei a ni. United legend George Best, Brian Kidd leh Wayne Rooney ten teenager an nih laiin season khatah goal 17 an khung a, Greenwood hian goal 16 khung tawhin match li khelh tur a la awm avangin record khum turin a dinhmun a ṭha hle.

Goalkeeper David de Gea-a'n sawisel kai deuh ṭhin mah se Villa lakah goal a chhuah lo a, tun season-ah clean sheet vawi 11 a nei tawh. Hei chauh hi a ni lo, Spanish keeper hian United tan match 399 a inlan ta a, Peter Schmeichel record khumin English mi ni lo United tana inlan tam ber a ni.