Goffin hnehtu Tsonga champion

Jo-Wilfried Tsonga chuan David Goffin lakah set hmasa ber a hloh zet hnua insiamṭhain 4-6, 6-4, 6-1 in hnehna a chang a, a vawi khat nan World Tennis tournament champion a ni.

Pathianni zana final khelh­ah seeded parukna Tsonga hian hnehna chang turin darkar hnih a mamawh a, kum 2011 final-a Robin Soderling hneh lotu hian final a vawi hnih khelh naah hlawhtlinna a chang. Seeded pathumna Goffin erawh tun hnaiah a vanduai chhunzawm zel rih, kar hmasa khan Sofia-ah Grigor Dimitrov hneh loin pahnihna a lo ni tawh bawk.

French tlangval Tsonga hian tennis a khelh hun chhungin match 401 hnehna a chang ta a, kum 2011 Vienna hnua a ATP 500 series title lak hmasa ber niin, a vaiin 13 a lakna chiah a ni. Tunkara ranking chhuak thar berah number 11 a ni leh tawh ang.

Kum 31-a upa Tsonga chuan, "Kum hnih chhung zet nomawi ka chawi loh hnuah hlawhtlinna ka chang ve leh ta a, ka inkhelh dan kalphung ka thlak ṭhenkhat chu ka hlawhtlinpui a ni. Ka service leh backhand-ah hmasawnna hmuh tur a awm a, hei hi tun hnai thla hnih chhunga ka zir chhuah a ni," tiin a khelh dana hmasawnna a neih thu a sawi.