Leverkusen khelmualah Atletico

Champions League 2014-15 season-ah khan Atletico Madrid leh Bayer Leverkusen chu last 16-ah an intawng a, a tawpa dingchang zawk chu Diego Simeone-a naute an ni. Zanin dar 1:15-ah team pahnih hi Europe club te inelna sang ber last 16-ah tho an inhmachhawn leh dawn a, German club hi phuba lak chakin an tuihal ang.

Atletico hian season thum chhung vawi hnih lai Champions League final lutin Europe a team hlauhawm pawlah an inlangkai a, tun hnaiah erawh La Liga lama an result vangin an 'zuamawm' sawt niin a lang a, chuhtirualin an zinna tur Leverkusen erawh eng ruai an ni bik lo! Mahni khelmual hman thiam vanga hming-ṭha club hi Bundesliga home match table bikah 11-na an ni a, inchhuang thei an awm lo.

Hmanah chuan...

Team pahnih hi tun hma­in vawi thum chiah an la inhma­chhawn a, in chhuang thei bik an awm lo. An intawn hmasak ber chu 2010-11 Europa League group stage a ni a, vawi hnih inkhelah 1-1 ve vein an ṭin. Champions League 2014-15 ah an intawng leh a, an khelmualah ve ve 1-0 in an chak. Quarterfinal lut zawk an awm ngei a ngaih avangin penalty hmanga chak zawk zawn a ni a, Simeone-a naute 3-2 in an tlang - Leverkusen ṭantuten an la theihnghilh lo.

German club tana thu hriat nuam lo tak a awm a, Diego Simeone-a'n Cham­pions League last 16 ( (2013-14, 2014-15, 2015-16) a luh tawhah paltlang loh a nei lo. Tun hnaia dinhmun derthawng anga an sawi Roger Schmidt leh a nauten Argentine ma­nager record ropui hi an thai chhiat sak thei ang em? Zaninah a chiang dawn.

A hming chu Chicharito

Leverkusen tana hriat nuam em em, Atletico tana thawm rimawi tling hauh lo tur chu Leverkusen chhuanvawr Javier Hernandez-a'n a thiam thil a 'show' ṭan leh ta hi a ni. Mexican striker hian match 16 zet goal khung loa hun a hman hnuah a eizawnna a la hai lo tih tun hnaiah a pholang a, a match hnuhnung pathumah goal nga a khung!

Tlarhnung phui vanga hriat hlawh ṭhin Atletico Madrid-in season dang angin an goal an venhim tawk tawh lo tih La Liga-ah hmuh turin a awm a, chak an duh a nih chuan Mexican striker Chicharito an ven a ṭul ang - season hmasaa inelna hrang hranga goal 26 khungtu striker hian 'a chet chhiat lai' tia an sawi season-ah meuh pawh goal 12 a khung tling leh der tawh.

Atletico an duai lo

Simeone-a nauten an match hnuhnung berah Sporting Gijon 4-1 a an sawp avangin phur takin Germany an pan dawn tih a chiang a, minute nga chhung leka hattrick siamtu Kevin Gameiro a phur lehzual ang! Belgian rawlthar Yannick Carrasco phur vanglai tak a ni a, kum 23-a upa winger hian tun sea­son-ah goal 12 a khung tawh.

Sawi hmaih thiang lo chu Antoine Griezmann a ni a, French forward hian tun season-ah goal 16 zet a khung tling der tawh - Leverkusen tlarhnung tan hna siamtu a ni dawn. Fernando Torres theihnghilh chi a ni lo a, Spanish forward hi kum 32 laia upa ni tawh mah se Celta Vigo 3-2 a an hneh ṭumin a thiam a la theihnghilh lo tih pholangin goal ropui bik a khung.

Spanish club tan hliam vanga chawl mek Diego Godin chu inlan leh thei tawh tura beisei a ni a, Simeone-a'n Uruguayan defender hi chawlh hahdamtir a thlang zawk a nih pawn a mak lo ang.