Barcelona tan Messi bawk
La Liga champion tum Barcelona-in Leganes laka hnehna chang turin hun tawp dawna Lionel Messi penalty an nghah thlen a ngai a, 2-1 in hnehna an chang hram. Champions League lama Paris St-Germain laka mualpho hlim club hi an la insiamṭha rih lo niin a lang.
Nou Camp a inkhelah Messi chuan minute lina lekah goal hmahruai khung mah se Leganes-in second half-ah Unai Lopez hmangin an si phurh an sut a, keeper Marc-Andre ter Stegen chet ṭhat zan ni lo se chuan Barcelona hi mualpho thei an ni.
Ter Stegen a langsar
Barcelona inkhelah keeper lansarh ṭum a van tehlul nen Pathianni zan inkhelah erawh German keeper Ter Stegen a langsar hle. Luis Enrique-a nauten inkhel ṭantir lamah game an thunun dawn viau niin a lang hman a, Luis Suarez-a ball pek ṭha zet chu Messi-an penalty area-a a ball khawi hmasak berah goal-ah a chantir nghal - Argentina captain hian PSG an hmachhawn ṭum khan penalty area-ah vawi khatmah ball a tawk fuh lo!
Mahse, hma taka Messi goal khung hnuah MSN tia hriat lar Messi, Suarez leh Neymar ten Leganes tlarhnung inremfuh tak an paltlang hleithei lo a, kum 89 hnua tun season a La Liga khel ve leh chauh club hian inrintawkna nen Gerard Pique leh Jordi Alba tel loa khel Barca tlarhnung an rumṭhaih fo bawk.
Leganes winger Nabil El Zhar goal khung tur nia lang chu vawi hnih lai Ter Stegen-a'n ṭha zetin a dan sak a, Borussia Monchengladbach keeper hlui hian Miguel Angel Guerrero pet goal ngei tur nia lang chu a kein a dang hman bawk. Minute 90-naah erawh Barca vanneih hun a inherchhuak. Neymar chu penalty area-ah tih tluk a nih avangin Catalan club hian penalty an hlawh chhuak a, Messi-a'n goal a chantir turin harsatna a nei lo.
Enrique a lungawi lo
Barcelona-in tun season-ah beisei an phak lo a, Leganes nen an inkhelh ṭumin fans ṭhenkhatin players leh coach an au el a, Barcelona boss Luis Enrique a lungawi lo hle. Spanish manager chuan, "Hun harsa tak kan tawng mek tih ka hai bik lo. Mahse, tun hi in auh el leh in tih el hun a ni lo a, hmangaihna lantir hun zawk a ni," tiin fan-te chet danah a lungawi lo hle.
Catalan club player zingah Andre Gomes tum bik a ni a, season ṭan dawna Valencia
aṭanga Barca pantu hi ball a chan apiang deuhthawin auh el a ni. Enrique chuan a player hi chhanin, "Andre Gomes auh el a ni kha ka hrethiam lo. Players auh nawmnah hian engmah hlawkna a nei lo a, hetiang lo pawh hian lungawi lohna lantir theih a ni. Fans-in min ṭan tlat hi kan chakna chu a ni a, Gomes auh el a nih avangin ka lungawi lo takzet a ni," tiin fan-te a dem thu a sawi.
Enrique ringtu Bartomeu
Tun hnaia Barcelona result ṭha lo avangin coach Luis Enrique hmalam hun a chiang lo nia sawi a ni a, mah se Catalan club president Josep Maria Bartomeu chuan an coach chungah rinna an nghah tlat thu a sawi. Bartomeu chuan, "Enrique nen hian April-ah contract thar chungchang kan la sawi ho tur thu kan sawi lawk tawh. Enrique hi kan coach duh ber a ni a, hna ropui tak a thawk a ni," tiin chhuahtir a la tum lo hle.
Barcelona captain Andres Iniesta pawhin an manager hi chhanin, "Players ten kan manager hi kan la ring tlat a, kan insiamṭha leh thuai ang tih ka ring tlat. Hnung lam kan hawi let thiang lo a, hmalam chiah thlirin kan hmaa inchhawp apiang neih tumin kan la bei zel dawn a ni, " a ti a, an coach hoa nomawi chawi ngei an la tum thu a sawi.