Ranking a pawimawh ber lo - Kerber

Angelique Kerber chuan tun dinhmunah chuan WTA ranking aiin ṭha taka a inkhelh theih dan tur chu a ngaih pawimawh hmasak ber a nih thu a sawi chhuak.

World number 2 Kerber hi tunkar chhunga khelh tur Dubai Tennis Championship-ah a inlan dawn a, vawiin chawhma dar 11:00 hian Mona Barthel a hmachhawn ang. Kerber hi a champion a nih chuan Serena Williams khumin world number 1 a ni thei dawn. Grand Slam vawi 23 champion tawh Serena hi Australian Open-a a champion hnuah a la inkhel leh rih lo.

German star Kerber hian nikum khan Australian leh US Open nomawi chawiin kum duhawm a hmang a, kuminah erawh tourna­ment pali khel tawhin a la champion miah lo.

Kum 29-a upa Kerber chuan, "A pawimawh ber chu ṭha taka ka khelh chhuah theih dan tur ngaihtuah hi a ni a, result ṭha ka neih chuan ranking chu amahin a lo sang ve zel. Nitin inbuatsaihna ka nei ṭha em em a, ka thawkrim bawk, a tawpah chuan result ṭha a rawn thlen ve leh ka beisei thlat a ni," tiin a sawi.