PSG an chelh
Pathianni zan French Ligue 1 inkhelah Paris St-Germain chu an mikhual Toulouse nen goal awm loin an inhenhtawk. PSG hian league hmahruaitu AS Monaco nih rualtheihna hun ṭha bawhpelhin table-ah pahnihna an ni.
Parc des Princes-a inkhelah champion lai PSG hian ball possession 77 zet chang mah se goal hmaah an hlauhawm tawk lo, Toulouse goal zawnah vawi thum chiah an pet thei. Uruguay striker Edinson Cavani chuan second half-ah a hun ṭha neih a chhawr ṭangkai thei lo, tun season league top scorer ni lai hian goal ban a tih per.
Champions League-a Barcelona 4-0 a sawp thei Unai Emery naute hian league match 26 khelh aṭanga point 56 hmuin Nice nen an point hmuh a inzat a, hmahruaitu Monaco chu point thumin an phak lo.
PSG manager Emery chuan, "Ka naute khan hnehna chang turin theihna an nei a, inkhel pawh kan thunun hle. Mahse, a pawimawh ber Toulouse tlarhnung kan ṭhiat hleithei tlat lo. Season bul kan ṭan dan nena khaikhin chuan vawiina kan game hi chu ṭha tawh tak a ni," tiin hma an sawn zel thu a sawi.
Inkhel dangah Saint-Etienne chu Montpellier lakah 2-1 in an chak lo. Kar hmasa khan Manchester United chuan Europa League round of 32 first leg-ah Saint-Etienne hi 3-0 in an sawp tawh a, Nilaini zanah second leg an khel leh ang.