Goal 100 khung thei Vardy

Premier League-a goal 100 khung thei Jamie Vardy-a'n Champions League khel turin a club khelhna Leicester City hruai thlen a tum dawn. July 12, Pathianni zan dar 12:30-ah Foxes hian Vitality Stadium-ah Bournemouth an hmachhawn ang.

Cherries hi relegate thei dinhmunah an ding a, an match hnuhnung berah Tottenham Hotspur an chelh. Pathianni zan hian Eddie Howe hote hian Leicester City chelh an tum leh dawn a, amaherawhchu Spurs striker Harry Kane aiin tun season-ah Foxes striker Vardy a hriam zawk.

Vardy hian tun season Premier League-ah goal 22 khung tawhin top scorer a ni mek a, asssist vawi li a nei tawh bawk. English striker hi minute 2674 inlan tawhin minute 122 danah goal khat khung zel ang a ni a, top scorer ni turin dinhmun ṭha mah se Pierre-Emerick Aubameyang (20 goals), Danny Ings (19) leh Mohamed Salah (19) ten an hlat loh avangin 'Golden Boot' dawng turin goal khung belh a la mamawh ang.