Chelsea hmaah Sheffield

Chelsea-in Premier League-ah pathumna dinhmun an hauh mek a, chutihrualin zanin dar 10:00-ah Sheffield United an hneh lo a nih chuan panganaa tla nghal thei an ni.

Chelsea, Leicester City leh Manchester United tan chuan tuna an dinhmun hi chu 'a che che, sih hlawkah' tih a ni ber a, tute tan pawh pressure a sang hle. Blues tan Sheffield lakah hian kum 29 mi N’Golo Kante a dam hman a rinawm loh. French midfielder tel lo hian Frank Lampard-a hote hian Crystal Palace 3-2 in hneh mah se tlarhnung a phui lo.

Sheffield United lakah Lampard-a'n tlarhnung a thuam ṭhat a ṭul dawn a, chutihrualin chak an mamawh avangin goal venhim thiam Blades lakah goal nawr nat a ṭul dawn. Chelsea-in Bramall Lane an tlawh hnuhnun ber chu kum 2006 daih tawh kha an ni a, 2-0 in an chak. Chutihrualin Blades an hmachhawn hnuhnun ber erawh nikum August 31 kha niin Stamford Bridge-ah 2-2 in an inhnehtawk.

Covid-19 hnuah Sheffield hi che ṭha tawk loin FA Cup aṭangin Arsenal hneh loin an tla a, Newcastle United leh Manchester United lakah 3-0 ve vein chak lo mah se tun hnaiah erawh Europa League khel tura an elpui Tottenham Hotspur leh Wolverhampton Wanderers te an hneh thei tih hriat a ṭha. Chutihrualin Chelsea tan Christian Pulisic leh Willian te a che ṭha em em a, heng player ṭha pahnih thlawp tur hian Olivier Giroud, Mason Mount, Ross Barkley, Tammy Abraham leh Ruben Loftus-Cheek te an awm avangin Sheffield tan dan an harsa ang.

Blues ṭantute ngaihven erawh Jorginho a ni a, Italian midfielder aiin Billy Gilmour rin a hlawh zawk. Amaherawhchu khup hliam vangin kum 19 mi Gilmour chhawr theih a ni dawn lo a,  Kante leh Mateo Kovacic te an dam hman a rinawm loh bawk avangin Jorginho hi February thla hnua a vawi khat nan inkhel bul ṭan thei dinhmunah 

a ding.