Sutton mumang titawptu Walcott
Theo Walcott-a'n Arsenal tan goal 100 a khung tling ta! Lucas Perez leh Walcott goal hmangin Arsenal hian Sutton United 2-0 in an hneh a, a zawna a vawi li nan FA Cup quarterfinal an lut - Non league club tan erawh an mumang duhawm a tawp. Gunners hian quarterfinal-ah chuan National League club Lincoln City an mikhual ve thung ang.
Allianz Arena-a Bayern Munich hneh lotu aṭangin Arsene Wenger-a'n player pasarih ngawt a siksawi a, Thawhṭanni zan Gander Green Lane-a inkhel Gunners squad-ah Mesut Ozil leh Hector Bellerin te hming a lang lo. Wenger-a naute hian tun dinhmuna an inkara club 105 zet awm Sutton lakah harsatna lian an tawk lo.
Mohamed Elneny leh Granit Xhaka te midfield-ah an inkawp a, Alexis Sanchez chu bench-ah khek a ni. Mnuite 26-naah Perez-a'n ama ball lakluh a khung a, second half minute 10-ah Walcott chuan Arsenal tana a goal 100-na a khung bawk.
Kum 27-a upa Walcott-a'n Chelsea nen 2006 League Cup final an khelh ṭumin Petr Cech venah Arsenal tana a goal hmasa ber a khung a, North Loncon club tan hian hat trick vawi ruk siam tawhin Gunners tana goal 100 khung tling thei player 18-na chiah a ni. Arsenal player ropui Thierry Henry, Dennis Bergkamp, Ian Wright leh Cliff Bastin te zingah Walcott hming hi tarlan a ni tawh dawn.
Keeper Cech aia lut keeper David Ospina ball pet chhuah ṭhat tawk loh avangin Adam May-a'n goal khungna hun ṭha a nei a, English midfielder hian goal zawnah a pet lo, forward Roarie Deacon pawhin goal bar a pet per ve bawk.
Thawklak hun...
Premier League leh Champions League nomawi chawi turin Arsenal tan khelh hmabak an la neiha khelh ṭhat ringawt a tawk zo tawh lo a, a elpui club dang result-ah an innghat thui tawh zawk. Season tawp ruala a contract tawp tur manager Wenger-a'n kum 20 chhunga hna a chelh hnuah bang tura an nawr nasat ber ṭum nia ngaih theih tur a tawng mek.
Arsenal hian a vawi 13 nana FA Cup champion ni turin beiseina an la nei a, kuminah an hlawhtling leh a nih chuan Wenger-a hnuaia an vawi ruk champion-na tur a ni ang. Boruak rit tak hnuaia ding mek French manager tan inkhelh harsatna hmun artificial pitch-a Sutton hneh hi a boruak tih zangkhaina ṭha tak pakhat a ni thei ang.
League table-a palina Arsenal hian March 4 khian league match khel turin an hnuai chiaha awm Liverpool an lenchilh dawn a, Wenger tan tun hi hmalam pan thei tura thawklakna hun ṭha a ni a, an elpui club hmachhawn turin inbuatsaihna hun thawl an nei.
Arsenal manager Wenger chuan, "Inkhelh ṭhan lohna hmuna luh thut chu a harsa duh hle a, kan tihsual hlek kha chuan hlauhawm taka min nawr theih nghal zel avangin round sang tak thlen hi an phu. Kan tan pawh a tir aṭanga a tawp thleng khan inthlahdahna hun min siamsak miah lo," tiin a sawi.
Wenger chuan sawi chhunzawmin, "Kum 20 liam ta khan fifth division club hi ka lo tlawh tawh a, khang hunlai nena khaikhin chuan hmasawnna a nasa tawh hle. An taksa a fit ṭha a, inbuatsaihna an nei ṭhain an inpekna a thuk bawk. Rilru huaisen nen hmachhawn ni lo ila chuan hnehna kan chang zo lo ang," a ti.
Mumang a tawp
Sutton hian an aia league sang khel AFC Wimbledon leh Leeds United te an hneh tawh a, kumin hi an club chanchina FA Cup an thlen san ber ṭum a ni. Tunah an zin kawng a tawp rih - mahse, club, player leh staff-te sulhnu erawh kumkhuain chhinchhah a ni tawh dawn a, an sawi zui rei ang.
Sutton manager Paul Doswell chuan, "Min ṭan tura mipui lo kal khawm zawng zawng kha an phur em em a, hmangaihna leh duhsakna thinlung nei chungin kan hnen an rawn pan. Theihna sang ber nena inelna kan hmachhawn avangin hetiang dinhmun hi kan thleng thei a ni," tiin a sawi. Gander Green Lane-ah hianṭhutna 765 chauh a awm a, Sutton leh Arsenal inkhel en turin mipui 5,013 zet an pungkhawm.
Arsenal hian £50,000 (Rs 41,62,472.15) chu an khingpui Sutton ṭanpui nan an pe dawn a, FA Cup dan leh hrai ang chuan Gunners hian hetiang zat hi an pe ngawt thei lo. Mahse, manager Doswell chuan an khingpui te lak aṭang hian kawng danga ṭanpuina an dawn theih dan tur a awm thu a sawi.
Doswell chuan, "£50,000 pek min tiam a, dressing room leh class room thar lei nan bakah toilet siamṭhat nan te kan hmang ang," tiin inthuamṭhat nana an hman tur thu a sawi. Doswell hian Arsenal an lo mikhualna tur inbuatsaih nan a mimal pawisa ṭhahnem tak a hmang.