Sergio Ramos-a'n Training a zawm

Real Madrid defender Sergio Ramos chu Espanyol laka 2-0 a an chak ṭuma a inlan loh hnuah club training a zawm leh tawh a, zanin dar 11:15-a Valencia an lenchilh hunah Real hi an captain kaihhruaina hnuaiah an khelh theih beisei a ni.

Hetihlai hian Thawhṭannia a hranpaa training neih tir Cristiano Ronaldo chuan nimin khan a ṭhiante zawmin training a nei ve leh tawh bawk a, Valencia tan hriat nuam a ni hauh lo ang. Real tan Espanyol hmachhawn lo zinga mi Fabio Coentrao chuan training a zawm leh tawh bawk a, Danilo erawh Valencia hmachhawn theih a beiseiawm loh.

Nikum August thla aṭang tawha hliam vanga players thlak kual reng renga hun hmang Zinedine Zidane-a tana thu lawmawm em em chu a players inhliam te an dam leh deuh vek tawh hi a ni a, Gareth Bale-a'n a lo kir lehna hmasa berah goal a khung leh der tawh a, Dani Carvajal leh Luka Modric-te Real jersey hain an inlan leh tawh bawk.

Real player dam kim deuhthaw mah se Valencia winger Nani erawh a zam phah lo. Portuguese forward chuan, "Thudik tak sawi ila, Real hmachhawn hi ka chak tawh a ni. Team lian kan tum chuan nuam ti taka khelh mai hi kan tihtur a ni a, tun hmaa Real ka lo hmachhawn tawhah pawh nuam ti takin ka khel ṭhin a ni," tiin Zinedine Zidane-a leh a naute a hlau lo.