I League-a Aizawl FC hmabak
Aizawl FC-in I League match 10 an khelh tawh aṭangin point 20 an hmu a, hmahruaitu East Bengal leh pahnihna Mohun Bagan an phak lohna chu point khat chauh a ni.
Mizo club hian Inrinni khan table chung bera awm Red and Gold an hneh theih avangin, season ṭan hmaa team naran ni thei tur zinga chhiar tel kha champion thei tur zingah dah tel an ni tawh.
Mumang ramah
Aizawl FC-in I League ṭanna match-ah East Bengal hi Barasat Stadium-ah 1-1 in an inhnehtawkpui tawh a, Kolkata club lian hi si phurh suttu zawk an ni.
Khalid Jamil-a kaihhruaina hnuaiah beisei phak bakin Mizo club an che ṭha chhunzawm a, match riat an khelh meuh chuan point 16 an hmu tawh.
Season liam ta khan Aizawl FC-in match 16 an khel a, an point hmuh zat chu point 16 chauh a ni. Tun season-ah erawh match 10-ah point 20 an hmu a, an khelh zat let hnih point an hmu thung.
MPL club hian tun Inrinnia an mikhual tur Chennai City hi khualmualah 0-2 in an hneh lo a, 2015 I League champion Mohun Bagan lakah 2-3 in an tlawm leh bawk. Aizawl FC hi tun season-ah match hnih chiah an la chak lo.
Mizoramah AFC an lian
Aizawl FC hian tun season-ah an mual RG Stadium, Mualpuiah result ṭha tak an nei a, champion an tum a nih chuan home record
ṭha hi chhunzawm a ṭul ang.
Khalid-a hote hian RG Stadium-ah Minerva Punjab, Shillong Lajong, DSK Shivajians, Churchill Brothers leh East Bengal-te an hneh vek a, point an hlohna awm chhun pawh Bengaluru FC niin champion lai Blues nen hian an inhnehtawk.
MPL club hian an muala match ruk an khelh tawh aṭangin point 16 an hlawh chhuak thei. RG Stadium-a an point hlawh chhuah ringawt pawh hi season liam ta chhunga an point hlawh chhuah zat nen a intluk.
Mizo club tan Mizo
Aizawl FC hian ṭantu an nei ṭha tih chu East Bengal nen an inkhelh ṭum aṭangin a chiang. Mizo club-in an muala record an neih ṭhat chhanah Mizo mipui an thawh hlawk hle.
Mizo club-in an muala match ruk an khelh tawhah hian chawhrualin mipui 6,000 bawr velin en ziah ang an ni a, AFC tluk loh chu stadium nei lian East Bengal, Bengaluru FC leh Mohun Bagan-te chiah an ni.
Inrinnia AFC leh Red and Gold inkhelh ṭuma entu zat kha official record-ah chuan 7,585 a ni a, amaherawhchu RG Stadium ṭhutnaa leng lo an punkhawm avangin a hmuna entu tak erawh official record aia tam daih an ni.
Hmabak
Aizawl FC hian tun Inrinni hian Chennai City an mikhual dawn a, March 4-ah Mumbai FC an mikhual leh nghal ang.
Mizo club-in an mualah match thum chauh khelh tur an nei tawh a, an hmachhawn hnuhnun ber tur chu Mohun Bagan an ni.
Jeje Lalpekhlua khelhna Mariners-in Mizoram an rawn khelh hun tur tih chian a la ni lo a, khualmuala Shillong Lajong an hmachhawn hun tur hriat a ni lo bawk.
Aizawl FC-in DSK Shivajians (March 7), Minerva Punjab (March 11), Bengaluru FC (April 9) leh Churchill Brothers (April 15) te an tlawh hun tur erawh a hriat tawh .
Aizawl FC-in season tawp lamah khualmuala match an ngah avangin an match khelh tur pahniha Chennai City leh Mumbai FC an mikhual tur hi a pawimawh lehzual dawn a ni.u