Luis Enrique a nghing lo

Barcelona president Josep Maria Bartomeu chuan Luis Enrique dinhmun a nghin loh thu leh an manager thlak tumna rilru pawh an neih loh thu a sawi chhuak.

Barca manager Enrique hian tun season-ah beisei angin a naute a khelh pui rih lo. La Liga-ah Real Madrid an phak lo a, Champions League last 16 first leg-ah Paris St-Germain 4-0 in an ngam lo. Kartawpa Leganes 2-1 an hneh ṭumin season tawp ruala a contract tawp ve tur Enrique hi fan ṭhenkhatin an au el!

Bartomeu chuan, "Kan duh ber chu Luis Enrique a cham zel hi a ni, tun hnai kum rei lote chhungin hlawhtlinna min chanpui hnem tawh a, a hnathawh vang hian fan-te an lungawi," tiin an manager a chhan.

Barca leh Spain midfielder hlui Enrique hian kum 2014 aṭang khan Catalan club hi a enkawl ṭan a, a season hmasa berah treble champion nghalin season liam ta khan league leh Copa del Rey (Spanish Cup) nomawi a chawi zui bawk.

Bartomeu chuan sawi chhunzawmin, "April thla hian Luis dinhmun turah inbiakna kan nei dawn a, amah thlak tura ruahmman kan nei lo," tiin an manager chu chhuahtir an tum lo hle.

Catalan club hian Spanish Cup final an lut tawh a, May 26 khian Vicente Calderon-ah Alaves an hmachhawn ang. Barcelona hian March 8 khian Nou Camp-ah Champions League last 16 second leg khel turin PSG an mikhual dawn a, tun Pathianni hian league lama an elpui Atletico Madrid an tlawh bawk dawn.