Eden Hazard-a'n Conte a fak

Chelsea midfielder Eden Hazard chuan season chhe tak an hman zawh hnu aṭanga khel ṭha leh turin theihtawp a chhuah thu a sawi a, coach Antonio Conte a fak tel bawk.

Kum 26-a upa Hazard chuan, "Season liam ta kha chuan mi zawng zawngin ka ṭha tawk lo tih an hria. Tunah chuan ka tihsual aṭangin ka inzir a, theihtawp ka chhuah avangin ngai ka awh leh tawh a ni," tiin a sawi.

Belgian midfielder Hazard chuan, "Tun sea­son-ah chuan hliam ka nei lo a, inkhel turin ka inpeih bawk. Khelmual chhung nuam tih ka zir a, chu chu ka tan chuan a pawimawh a ni. Season chhe tak hman zawh hnua khelh ṭhat hi a har a, amaherawhchu boss (Antonio Conte) in kalphung thlak danglamin inrintawkna min pe a ni," tiin tuna a khelh danah a lungawi hle.

Chelsea midfielder hian tun season-ah league match 24 khel tawh­in goal 10 a khung a, season liam ta aiin goal rukin a khung tam zawk. Hazard hian Premier League-a Chelsea a champion pui ṭum khan goal 14 a khung a, hemi ṭum hian Premier League Player of the Season leh PFA Players' Player of the Year ah thlan a ni.

London club hian Inrin­ni hian Swansea City an mikhual dawn a, Antonio Conte hote hian league match 25 an khelh tawh aṭangin point 60 an hmu a, anmahni hnaih bertu Manchester City aiin point riatin an hmu tam zawk.