Champions League Mang ramah Leicester City?

Season hmasa Premier League nomawi mak taka chawi­tu Leicester City-in league lamah an thiam an theih­nghilh a, relegate thei dinhmunah an ding mek. Claudio Ranieri-a naute tan nikum thil mak ang an chhawm nun theihna awmchhun chu Champions League chiah a ni tawh a, zanin dar 1:15-ah last 16 khel turin Sevilla an lenchilh dawn.

FA Cup fifth round aṭanga an tlak hnu lawkah Foxes manager Claudio Ranieri-a'n, "Sipai huaisen leh ral hrat khawkheng ka mamawh a ni. Ka player-te hnena ka sawi duh chu kan hmabak match zawng zawngah theihtawp kan chhuah zel a ngai tih hi a ni," tiin a naute chu rilru huaisen pu tura a duh thu a sawi tawh a, team huaisen ni 'ṭhin' Foxes-in an mangchhia aṭanga harh ngei an duh.

Serie A champion Juventus chuan zanin dar 1:15-ah vek last 16 khel turin FC Porto an len­chilh dawn bawk a, coach Mas­similiano Allegri hnuaia Champions League nomawi chawi duh club hian Portuguese club khelmualah tlawm an duh lo ang.

Harh rawh u!

Foxes boss Ranieri chuan, "Season hmasaah kha chuan tun season a kan tlawm ṭhinna ang match-ah hi chuan kan chak ṭhin a, kan khingpuite aiin tumruhna leh huaisenna kan neih ṭhin vang a ni. Ka naute hian a tawp thlenga an bei lai hmuh ka duh a, kan thinlung paukhauh tak ang kha an neih leh ka duh a ni," a ti a, Italian manager hian a naute kaihharh a duh.

Hetihrual hian Foxes tan Sevilla khelmualah hna a awlsam sawt phah dawn lo. Europa League nomawi vawi thum a zawna chawipuitu Unai Emery-a'n chhuahsan mah se Spanish club hian Jorge Sampaoli enkawlna hnuaiah La Liga table-ah pathumna dinhmun an luah mek thei a, an Champions League zinkawng pawh hi last 16-a tawp tir mai an duh lo ang.

Foxes manager Ranieri-a'n pound maktaduai 28 man striker Islam Slimani hliam chungchangah thuchiang zawk an nghah mek thu a sawi a, Algerian striker hian an match hnuhnung bera Milwall an ngam loh ṭum pawn a hmel a lan tawh lo. Sevilla lamin an defender pawimawh Nicolas Pareja-a'n training a zawm tawh thu an puang thung.

Vardy & Mahrez

Leicester-in Premier League nomawi an chawina kawngah Jamie Vardy leh Riyad Mahrez an pawimawh takzet a, tun season-ah erawh player pahnih hi hmuh tur an vang ṭhin hle! English striker Vardy-a'n season hmasaah match 38 khelin goal 24 zet a khung a, tun season-ah erawh match 28 inlan tawhin goal ruk bak a la khung lo - Foxes an harh dawn chuan Vardy harh a ṭul!

PFA Player of the year Mahrez-a'n season hmasaah match 39 khelin goal 18 a khung a, tun season-ah match 30 khelin goal sarih chiah a la khung! Player ball thiam leh fing tak tia sawi ṭhin hi season hmasaa a thiamna ang kha tun season-ah hmuh tur a awm lo - Champions League hi a hming chhe mek thaichhiatna remchang a ni.

Inkhel hmuhnawm tur

Juventus-in match sarih chhung inelna hrang hrangah a zawnin an khingpui an hneh tawh a, boruak ṭha tak hnuaiah Porto an lenchilh dawn. Mahse, Portuguese club hi dah hniam ngawt theih an ni bik lo - an match hnuhnung parukah an khingpui an hneh ve vek tho! Team ṭha pahnih an boruak ṭhat vanglai takin an intawng dawn a, inkhel hmuhnawm beisei a sual lo ang.

Porto-in hliam vanga player chhawr theih loh an nei dawn lo a, an ṭhat dan berin Italian champion an mikhual thei ang. Juventus-in tlarhnungah Andrea Barzagli leh Giorgio Chiellini an chhawr theih a beiseiawm loh a, Miralem Pjanic erawh a dam tawh thung.

Portuguese club tlarhnung tana ven uluk ṭul tur erawh Gonzalo Higuain a ni. Kum 29-a upa striker hi Naples khaw­pui aṭanga Turin lama a insawn hnuah pawh a thiam a la theihnghilh lo. Tun season-ah match 32 khelin goal 22 a khung tling leh der tawh a, a match hnuhnung 12-ah goal 12 a khung thei - ven bik a sual lo ang.