Federer-a'n Nadal nena ṭan duh

Grand Slam vawi 18 champion tawh Roger Fe­derer chuan Laver Cup khelh a nih hunah Rafael Na­dal nen doubles-ah ṭan­dun a chak thu a sawi chhuak.

September 22-24 chhung hian O2 Arena-ah a vawi khat nan Laver Cup khelh a ni dawn a, Bjorn Borg captain-na hnuaiah European player ṭha paruk leh khawmualpui dang zawnga player ṭha paruk dang intelkhawm an inhmachhawn ang a, khawmualpui dang zawng captain atan John McEnroe a ni thung ang.

Kum 35-a upa Federer chuan, "Engtiklai pawhin Rafa nena inkhelh hi ka duh a, kan inelna boruak hi a hautakin a lian ve hle. Laver Cup khelh turah pawh hian thu chiang la awm lo mah se ani nena doubles khelh dun ka hreh lo," tiin a sawi.

Laver Cup hi Grand Slam vawi 11 champion tawh Rod Laver chawi­mawi nana buatsaih tur a ni a, Australian legend hi a vanglai chuan khawvela ṭha ber niin kum khat chhungin major title ṭum hnih a kawl khawm vek thei!

Player langsar Andy Murray, Novak Djokovic leh Stan Wawrinka te pawh inlan tura ngaih an ni a, inelna dang angin ATP ranking points a awm lo thung ang.