Indian Premier League Ben Stokes man a to ber

April 5 aṭanga khelh ṭan tur Indian Premier League players lilamna chu Thawhṭanni zan khan neih a ni a, IPL chanchina foreign player manto ber ni turin Ben Stoke chu Rising Pune Supergiants chuan vaibelchhe 14 (pound maktaduai 1.4) in an lei.

English all-rounder hian amah ang thoa England player kum 2009-a pound maktaduai 1.1 man Kevin Pietersen leh Andrew Flintoff ten foreign player manto ber dinhmun an lo luah tawh chu a khum a ni.

Kum 25-a upa Stokes hi a base price chu vaibelchhe hnih a ni a, Mumbai Indians, Royal Challengers Bangalore, Delhi Daredevils, Sunrisers Hyderabad leh Rising Pune Supergiants ten an inchhan huai siak hnuah Pune hian an chang ta a ni.

English player zingah Stokes chauh hi manto taka kal a ni lo. Bowler Tymal Mills chu Royal Challengers Bangalore chuan vaibelchhe 12 (pound maktaduai 1.4) zetin an lei. Indian player zingah Karn Sharma man a to ber a, Uttar Pradesh tlangval hi vaibelchhe 3.2 a hralh a ni. Indian players langsar ten club an neih sa tawh avangin lilamnaah hian an hming chhawpchhuah ve a ni lo.

Nun thlak danglamtu

Rising Pune Supergiants tana khel tur Ben Stokes chuan, "Ka man zat inṭanna aia a let sariha tamin min lei a, ngaihtuah mai pawh hian a mak zawk a ni. Ka tan chuan heti zat sum hi chu nun thlak danglam dawrh thei a ni. Twitter-ah vaibelchhe tam zia leh ka man san zia an sawi ka hmun nual a, mak tak a ni. IPL khelh hlan ka nghakhlel a, ka phur takzet a ni," a ti.

Vaibelchhe 12 man Tymal Mills chuan, "Ka man zat kha ka hrethiam chiah lo a, mah se engkim zawh hnuah khan uluk takin ka chhut a, khati zata pawisa tam hlawh tura min duh hi a mak a ni. Heti zat sum hi chuan ka nun a thlak danglam thei dawn a, in tan a tlem a nih pawhin ka tan chuan a tam takzet a ni," tiin a hlim hle.

Club hmu zo lo

Indian Premier League players lilamnaah hian cricketer 357 zet hming chhawpchhuah a ni a, an zinga 66 bakin leitu an nei lo. Indian players langsar zingah Irfan Pathan, Ishant Sharma leh Cheteshwar Pujara ten leitu an hmu zo lo! India all rounder neih ṭhat ber pawl nia an sawi ṭhin Irfan Pathan hi a base price chu nuai 50 chauh ni mah se heti zata lei duhtu pawh a hmu lo.

Kum 2008-a IPL ṭan a nih hnua club khelhna nei lo ngai lo Ishant Sharma chuan a vawi khat nan lei duhtu a hmu zo lo a, kum 28-a upa fast bowler hi a base price chu vaibelchhe hnih a ni. Nuai 50-a a man zat inṭan Cheteshwar Pujara chuan lei duhtu a hmu lo bawk a, kum 29-a upa batsman hian 2014 hnuah IPL club a nei leh tawh lo a ni.

Ram pawn player langsar zingah rin loh takin nuai 50-a a man zat inṭan Imran Tahir chuan lei duhtu a hmu zo lo bawk a, kum 37-a upa bowler hi South African cricketer zinga ODI-a wicket 100 la tura match mamawh tlem ber ni mah se a sulhnu ropuiin IPL-ah nghawng a nei phak lo.

Buaina ram aṭangin...

Indian Premier League-ah beisei loh takin Afghanistan pla­yers pahnih an lang a, Moham­mad Nabi leh Rashid Khan te chuan a vawi khat nan sum tamna IPL-ah an hmel an lan dawn. IPL-a Afghan player lei hmasak ber ni turin Nabi chu Sunrisers Hyderabad-in an lei a, Afghan all rounder manah hian nuai 30 an inseng.

Nabi lei a nih hnuah mipui mak tih turin Rashid Khan chu vaibelchhe li zetin hralh a ni! Kum 18 leka upa bowler hmabak nei eng tak hi Mumbai Indians leh Sunrisers ten an inchhan huai siak a, Afghan player Nabi lo lei tawhtu Hyderabad club hi an dingchang ta zawk a ni.

Retheihna ata ropuina ramah...

IPL players lilamnaa sawi hlawh ber pakhat chu Mohammed Siraj a ni. Kum 22-a upa fast bowler hi autorickshaw driver fapa niin Sunrisers Hyderabad chuan vaibelchhe 2.6 zetin an lei a, a man zat inṭanna hi nuai 20 a ni!

Kum 2015 Ranji Trophy-a a first class cricket match hmasa ber khel ve chuah Siraj chuan, "Tun hnaiah ka khelh ṭhat avangin club khelhna hi chu ka hmuh ve mai ka ring a, mah se heti zata sum tam hi ka hlawh phak erawh ka inbeisei lo. Tunah chuan ka chhungte tana in nuam tak lei sak phawt ka rilruah a awm a ni," tiin a hlim hle.

Players langsar ni lo zing­ah India A team bowler Aniket Choudhary chu Royal Challengers Bangalore-in vaibelchhe hnihin an lei a, Tamil Nadu pacer T Natarajan chu Kings XI Punjab chuan vaibelchhe thumin an lei bawk.

Engtikah nge IPL?

Board of Control for Cricket in India (BCCI) buatsaih Indian Premier League-ah hian team pariat Delhi Daredevils, Gujarat Lions, Kings XI Punjab, Kolkata Knight Riders, Mumbai Indians, Rising Pune Supergiants, Royal Challengers Bangalore leh Sunrisers Hyderabad te an inel dawn a, April 5-ah khel ṭanin May 14-ah final khelh a ni ang.

Team pariat hian league match an khel kual ang a, a sang paliin playoff an khel dawn a ni.