Europa League United last 16 luh zan?
Manchester United-in zanin dar 10:30 hian Stade Geoffroy-Guichard-ah Saint Etienne an hmachhawn dawn a, Europa League last 32 second leg inkhel hi Ten 1 HD-ah a en theih ang.
Jose Mourinho hoten Old Trafford-ah Zlatan Ibrahimovic-a hattrick hmangin French club hi 3-0 in an hneh tawh a, United hi last 16 lut turin an dinhmun a ṭha hle.
Zaninah maw?
Europa League hi Ningani zanah khelh ṭhin a ni a, zanina Saint Etienne ten United an mikhual chhan hi Lyon leh AZ Alkmaar ten second leg an khelh ve dawn vang a ni.
France khaw pahnih hi 50 km chauha inhlat a nih avangin UEFA chuan zan ruala khelhtir loin Saint Etienne khelh hun an sawn hma sak a, Lyon erawh season liam taa Ligue 1-a an dinhmun a ṭhat zawk avangin hun pangngaiah an khelhtir thung.
UEFA hnuai club inelnaah hian seeded team hian khualmualah first leg an khel hmasa a, second leg hi an mualah an khel thung. Saint Etienne hi group hmahruaitu niin seeded ni mah se team ṭha zawk United an hmachhawn avangin an vanduaiah a ngaih theih.
Rooney tel loin
Manchester United-in inhliam vangin Wayne Rooney leh Phil Jones an chhawr thei dawn lo a, captain Rooney hi match li chhung a inlan tawh lo. Spanish midfielder Ander Herrera pawh hrem vangin chhawr thei a ni lo bawk ang.
Red Devils tana thu lawmawm erawh FA Cup-a Blackburn Rovers an hneh ṭuma squad-a tel lo keeper David de Gea leh right back Antonio Valencia te chu hahdamtir an nih avangin French club an hmachhawn leh thei tawh dawn.
Jose Mourinho-a'n goal thum lai khung tawh mah se Saint Etienne nena an inkhel tur hi an lak thu tak tur thu a sawi lawk a, Zlatan Ibrahimovic leh Paul Pogba te an inlan nghal a nih pawhin a mak lo ang.
Champion tum United
Season ṭanna atana khelh ṭhin Community Shield-ah FA Cup champion Manchester United-in Premier League champion Leicester City an hneh a, amaherawhchu Community Shield hi chu ngaihhlut a ni lo.
Jose Mourinho hote hi inelna pali - EFL Cup, FA Cup, Premier League leh Europa League-ah champion thei vek an la ni. Pathianni zan khian Wembley Stadium-ah United hian Southampton nen EFL Cup final an khel dawn.
United tana League Cup final atana inpuahchahna ṭha ber chu player hahdamtir ni loin Saint Etienne hneh a, phur taka Wembley Stadium pan a ni ang. Hei vang hian Mourinho duh chu last 16 thlen chauh ni loin Saint Etienne hneh nawn a ni ang.
Saint Etienne lam
French club Saint Etienne hian Ligue 1-ah Montpellier 2-1 in an hneh lo a, United lamah an thawhchhuah theih a rinawm loh. Amaherawhchu Saint Etienne tana thu lawmawm chu tun season-ah Europa League-ah vawi khatmah chak loh an la nei lo a, zaninah chan tur an neih tawh loh avangin United tan hna a sa harsa phah ang.
Inkhel dang
Fenerbahce-in zanin hian Russia club Krasnodar an mikhual ang. Group stage-ah Turkish club hi Manchester United chungah an awm a, knockout stage-ah erawh Russia ramah Krasnodar 1-0 in an hneh lo a, an hmabak a awlsam lo.
German club Schalke 04-in Greece-ah PAOK 3-0 in an sawp a, zaninah an mualah second leg an khel dawn. Bundesliga-a 10-na ni mek Schalke tan hna harsa tur a awm tawh lo.
Time Home 1st Leg Away
Zanin Inkhel Tur
10:30 PM Saint-Etienne 0 - 3 Manchester United
10:30 PM Fenerbahce 0 - 1 Krasnodar
10:30 PM Schalke 04 3 - 0 PAOK
February 23, Ningani Zan
09:30 PM Osmanlispor 0 - 0 Olympiakos Piraeus
11:30 PM APOEL 2 - 3 Athletic Bilbao
11:30 PM Ajax 0 - 0 Legia Warszawa
11:30 PM Zenit 0 - 2 Anderlecht
11:30 PM Roma 4 - 0 Villarreal
11:30 PM Besiktas 3 - 1 Hapoel Be'er Sheva
1:35 AM Genk 2 - 2 Astra
1:35 AM Copenhagen 2 - 1 Ludogorets
1:35 AM Shakhtar Donetsk 1 - 0 Celta de Vigo
1:35 AM Tottenham Hotspur 0 - 1 Gent
1:35 AM Sparta Praha 0 - 4 Rostov
1:35 AM Fiorentina 1 - 0 Borussia M'gladbach
1:35 AM Lyon 4 - 1 AZ