Match hmasa berah Thiem a tla nghal

French Open 2022 an khel ṭan a, mipa player zinga hming langsar Dominic Thiem chu hneh nei loin a zinkawng a tawp nghal. Champion tura rinkai zinga mi Carlos Alcaraz leh Alexander Zverev te erawhin second round an inhlangkai thung.

Thiem tan season duhawm lo a ni tih chu inhrilh nawn a ngai lo. A banrek hliam dam hnuah match a khel ve leh nual tawh, a match hnuhnung 11 zetah erawh a chak lo vek - thla kua zet inkhel loa a chawl chuan a nghawng na hle.

Pathianni zan Paris khawpuia inkhelah Thiem hi Hugo Dellien lakah 6-3, 6-2, 6-4 in a chak lo. Roland Garros hi a inkhelh thiamna hmun a ni a, 2018 leh 2019 khan final hial a thleng. Mahse, tun hnaiah erawh mangchhiain a kalsan thei rih lo.

US Open champion hlui Thiem chuan, "Chak loh hi chu a hrehawm, engtik lai mahin a nuam ngam lo. Taksa lamah harsatna ka nei lo a, rilru lamah pawh ka buai lo, chhuanlam tur ka nei lo bawk.

"Training ka nei thei a, mahse chu chu a ṭha tawk lo," a ti. Tun dinhmunah Thiem hi world number 194 a ni a, season chawhnu lamah a ranking siamṭha tura thapui thawh a tum ang, hmabak a hautak dawn hle.

Inkhel dangah Carlos Alcaraz chuan Juan Ignacio Londero chu 6-4, 6-2, 6-0 in a hneh. Spanish rawlthar hian season duhawm a hmang mek a, kum 19 mi chauh la ni mah se tun hnaia a khelh dan thlir chuan champion rinkai zingah a tel phak.

Madrid Open leh Barcelona Open-ah Alcaraz hi a champion a, Spain khawpuia nomawi a chawina kawngah phei chuan world number 1 Novak Djokovic leh Rafael Nadal te a hneh hial, zuam sual theih tak tur a ni.

Alexander Zverev pawhin set a hloh lo. German tlangval hian Sebastian Ofner chu 6-2, 6-4, 6-4 in a hneh, a vawi khat nana Grand Slam champion a tum a nih chuan tournament tir lama set hloh loh theih zel a pawimawh ang.

Seeded pakuana Felix Auger-Aliassime chuan fiahna a paltlang. Set hmasa pahnih a hloh hnuah world number 122 Pablo Varillas chu 2-6, 2-6, 6-1, 6-3, 6-3 in a hneh let thei hram.

Nizan khan vawi 13 champion tawh Nadal a inlan a, seeded pangana Nadal hian Jordan Thompson a hmachhawn, result erawh kan hre hman lo.