Zanin PVL semifinal khel dawn

Tualchhung volleyball inelna lian Zothan Autoworks Pro Volleyball League hmawrbawk a hnai. Mipa inelna lamah zanin aṭangin semifinal khelh a ni dawn, team ṭha pali inelna chin a nih avangin a hmuhnawm ang.

Zanin dar 8:00 hian R. Dengṭhuama Indoor Stadium, Mualpuiah Hunthar leh Thutak Nunpuitu Team (TNT) ten semifinal hmasa zawk an khel dawn. League round an khelh dan thlir chuan Hunthar hi rinkai zawk an ni.

Hunthar hian league round match li an khelhah an khingpui an hneh vek. Vawi hnih champion tawh hian TNT ngei pawh hi 3-0 in an lo hneh tawh, inrintawkna sang tak nen zaninah pawh an inlan thei dawn.

An intawn hmasaka D3 Business Player of the Night ni thei Gagan Kumar chu Hunthar innghahna a ni leh dawn, ani bakah hian Laldensanga, Lalramnunfela leh Zomuansanga te an awm avangin team an ṭha tawk hle.

TNT tan thih tha a beih an ngai dawn, Muanna Veng team hian Vanlalṭanchhana (Buanga) an nei a, 6ft 2in a sang Buanga hi India Under 20 tan pawha koh tawh a ni. Buanga leh tawnhriat nei ṭha Sadraka Fanai bakah Zosangzuala an inkawp fuh a nih chuan final beseina an nei ngam ang.

Mipa - Semifinal

May 24, Thawhlehni
Hunthar 08:00 PM TNT
May 25, Nilaini
Tuichangral 08:00 PM Durtlang North

Hmeichhia - League Round

May 23, Thawhṭanni
Bethlehem Vengthlang 08:00 PM Durtlang