Legend kan ni a, min hre reng tawh ang–Pep

Manchester City manager Pep Guardiola chuan season nga chhunga Premier League vawi li an champion hnuah a team enkawl chu 'legend' an nih thu a sawi. Guardiola hian England a pan hnuah kum ruk chhungin nomawi 11 a chawi thei a, a hnathawh hi a ropui hle.

Guardiola chuan, "Legend kan ni a, min hre reng tawh ang. Tuna player-te hi chu he club-ah hi chuan an hnathawh avangin an thi tawh lo ang. Thil harsa bik chu an tithei a ni.

"Sir Alex Ferguson khan Manchester United a enkawl lai khan ṭum hnih thum chu a lo ti tawh a, a ropuizia leh harsatzia ka hrefiah tawh. Chutiang tithei zingah chuan kan tel a ni," tiin a an hnathawh chu chhuang takin a sawi.

'Minute 5'
Manchester City-in kum 10 kal ta khan a vawi khat nan Premier League nomawi an chawi a, an hmelma Man United aiin goal difference-a an ṭhat zawk vangin an champion.

League tawp niah Man City hian QPR an mikhual a, minute 90 a nihin mikhual team hian 2-1 in hma an la hruai. Thilmak a thleng a, injury time-ah City tan Edin Dzeko leh Sergio Aguero ten goal an khung.

Hetiang ang taka Premier League tawp ni boruak san hi a thlen nawn leh theih a rinawm lo a, mah se tun Pathianni khan a thleng nawn tlat. Man City chuan Aston Villa an mikhual a, champion turin chak mamawh mah se minute 75-naah 2-0 in an la hnufual.

Minute nga chhungin engkim a danglam. Bernardo Silva thlaktu Ilkay Gundogan chuan minute 76-naah siphurh sut ṭhenna goal a khung a, Rodri-a'n siphurh sutna goal khungin Germany international midfielder Gundogan-a'n minute 81-naah chakna leh champion-na goal a khung. Goal thum hi minute nga chhunga lut a ni.

A ropui lai chu
Man City an vannei tel tih hai rual a ni lo a, chutihrualin an thiam tih pawm a ṭul. Premier League-ah chauh ni loin Champions League-ah pawh team ṭha ber khelhin an khel chhuak ṭhin a, Europe inelnaah erawh an vanduai thung.

Pep Guardiola chuan, "Match tawp ber hi chu a danglam ṭhin a, boruak a sang ṭhin. Aston Villa-in theihtawp an chhuah a, goal hmasa ber khan engkim a thlak danglam. Premier League-ah season nga chhunga vawi li kan champion theih chhan chu ka player-te vang a ni a, an danglam a ni," tiin a naute a fak.

Spanish manager hian kum 2008 aṭangin manager hna a thawk ṭan a, a inzirchhuahna Barcelona a enkawl. Pep hian Barca hi season li chhungin vawi thum a champion pui a, Germany-ah kalin Bayern Munich chu season thum chhungin league-ah a champion pui vek.

Barca-in player an nei ṭha a, Bayern-in German football an thunun bawk avangin Pep-a hian a phu tawk ang fakna a dawng lo. Spanish manager hian league harsa ber tia an sawi England a pan a, manager langsar Jose Mourinho, Jurgen Klopp, Antonio Conte leh Thomas Tuchel bakah manager ṭha dang nen an inel.

Man City-in sum an hmang tam tih chu zep rual a ni lo a, chutihrualin an khingpuite pawhin sum ṭhahnem tak an hmang. Man United-in City hman tluk zet sum an hmang chungin Europa League an khel pha hram a, an elpui ber Liverpool pawhin Virgil van Dijk leh Alisson Becker te man to takin an lalut tih hriat a ṭha.

Team ṭha leh player ṭha rual awm khawmnaah Man City an chungnung a, Pep-a hnuaiah season ruk chhungin vawi li an champion. Spanish manager hian season 13 chhungin league nomawi vawi 10 a chawi thei a, a hnathawh hi a ropui takzet a ni.

An lawm dawn
Man City manager Pep Guardiola chuan, "Min ṭantute hmaa hnehna chan hi a nuam lai ber chu a ni. Kan siphurh kan sut chiah khan goal thumna kan khung thei tih kan hria a, helai hmuna ka awm tawh hnua ka hun tawnah a nuam ber. Manchester kawthlerah kan champion hi kan lawm ang," tiin an lawm tur thu a sawi.

Pep-a kaihhruai City an ṭha a, chutih-rualin an elpui Liverpool dah hniam chi an ni lo. Spanish manager chuan, "Liverpool vangin kan ṭhat phah a, kar tinin hma kan sawn. Tunah rih chuan ka chau lutuk a, season thar ngaihtuah turin thahrui ka nei rih lo," tiin inkhelh banah a sawi.

Man City-in point 93 an hmu a, Reds-in point 92 hmu chunga an champion lo hi an vanduai hle. Jurgen Klopp-a hote hi champion phu khawpin an khel ṭha a, amaherawhchu an elpui hi City an nih miau avangin pahnihnaah an lungawi a ṭul a ni.