FC Madras academy awm duh tan kawng a inhawng

Mizoram Professional Footballers Association buatsaihin FC Madras chuan an academy-a awm tur thlangin Mizoramah trial an huaihawt dawn a, vawiin hian trial hmasa ber chu neih tur a ni ang - thlante chu scholarship pek an ni ang a, mahni insenna tur a awm lo ang.

FC Madras Residential Academy hian kum 13 leh kum 15 hnuai lam tan trial hi an nei dawn a, Under-13 (2010-2013 inkara piang) trial hi vawiin chawhma dar 9:30-ah neih tur niin, May 25, Nilaniah Under 15 (2008 & 2009-a piang) pualin trial neih leh a ni ang - reporting time hi zing dar 9:30-ah tho a ni.

Trial hi Mini Sports Complex, Lengpuiah neih tur niin, Aizawl aṭanga kal tur, kalna tur nei lo tan AR Lammual bulah bus a awm dawn a, zing dar 8:00-ah Lengpui pana chhuah hman tur a ni dawn a ni.

Lungleiah pawh trial hi huaihawt a ni dawn a, May 27, Zirtawpni, zing dar 6:30-ah Under 13 trial neih a ni ang a, May 27, tlai dar 3:30-ah Under 15 trial neih leh tur a ni dawn bawk - trial neihna tur hmun hi Ṭhuamluaia ground-ah a ni ang.