Golden State tan match khat a la ngai
NBA Finals khel turin Golden State Warriors chuan match khat chak a la ngai. Nimin zing Western Conference final game 3 inkhelah GSW hian Dallas Mavericks chu 109-100 in an hneh.
Best of seven series-ah Warriors hian 3-0 in hma an hruai fal ta. May 25, Nilainiah game 4 an khel leh dawn. Mavericks tan inhamtang tur chuan chak ngei ngei a ngai, an chak lo a nih chuan an zinkawng a tawp tawh ang.
Playoff chinah chuan, game hmasa pathuma chak lo team an la tho chhuak ngai lo. Luka Doncic awmna Mavericks hmabak a hautak dawn hle, basket neih chauh ni loin a venhim an ngaih pawimawh a ngai dawn.
Nimin zing inkhelah Stephen Curry (31 points), Andrew Wiggins (27) leh Klay Thompson (19) te an khel ṭha a, player dang pahnih Draymond Green leh Jordan Poole ten point 10 an nei bawk.
Warriors coach Steve Kerr-a'n Donic veng turin a naute fuih viau mah se ven sen a ni lo. Slovenian tlangval hian point 40 zet a nei tho a, point 26 neitu Spencer Dinwiddie leh Jalen Brunson (20) te an khel ṭha bawk.
Mahse, Mavericks player dang zingah point 10 nei tling thei dang an awm lo. Player pathum hi an innghahna an ni mai a, an thawhhona a ṭha tawk lo. Team anga khel ṭha zawk Warriors an chungnung ta zawk a ni.
Tukin dar 6:00 hian Eastern Conference finals game 4 an khel dawn. Miami Heat chuan Boston Celtics lakah 2-1 in hma an hruai mek, tukin match hian a tlang tur zawk a la chingfel dawn rih lo.
Western Conference Finals
Game 1: Golden State Warriors 112 - 87 Dallas Mavericks
Game 2: Golden State Warriors 126 - 117 Dallas Mavericks
Game 3: Dallas Mavericks 100 - 109 Golden State Warriors
May 25, Nilaini
Game 4: Dallas Mavericks 06:30 AM Golden State Warriors
(Golden State hian series-ah 3-0 in hma an hruai)
Eastern Conference Finals
Game 1: Miami Heat 118 - 107 Boston Celtics
Game 2: Miami Heat 102 - 127 Boston Celtics
Game 3: Boston Celtics 103 - 109 Miami Heat
May 24, Thawhlehni
Game 4: Boston Celtics 06:00 AM Miami Heat
(Miami hian series-ah 2-1 in hma an hruai)
Note: Best of seven series hmanga chak zawk zawn a ni a, chak turin game li lak a ngai. Game hmasa pali fixture tihlan phawt a ni.)